Фото: KazNARU баспасөз қызметі
Сертификатты WSB Академиясының Халықаралық ынтымақтастық жөніндегі проректоры, доктор Рафал Рембилас табыстап, бұл мәртебелі атақ KazNARU басшысы А.Қ.Күрішбаевқа ғылым мен жоғары білімді дамытудағы үздік жетістіктері үшін және екі елдің ғылыми қауымдастықтары арасындағы ынтымақтастықты нығайтуға қосқан зор үлесі үшін берілгенін айтты.
Өз кезегінде, KazNARU ректоры Ақылбек Күрішбаев университеттің поляк серіктестерімен орнатылған ынтымақтастығының маңызды бағыттарына тоқталып, жоғары білім және ғылым саласында бірлесе атқарылған белсенді жұмыстарға ризашылығын білдірді.
«Кездесу аясында бәсекеге қабілетті кадрларды даярлау бойынша бірлескен білім беру жобаларын іске асыру; менеджмент және іскерлік әкімшілік саласында екі дипломды білім беру бағдарламаларын құру; цифрландыру және ақпараттық технологиялар, ғылыми-зерттеу бағдарламалары мен қолданбалы зерттеулер саласын дамыту мәселелері егжей-тегжейлі талқыланды», делінген хабарламада.
Қос тарап өзара тиімді ынтымақтастықты одан әрі тереңдету туралы ортақ пікірге келіп, бірлескен білім беру бағдарламалары туралы Меморандумға қол қойды.
