Биылғы ерекшелік – қаржылық сауаттылық негізін мектеп қабырғасынан бастап оқыту жоспарланып отыр. Ол үшін Үкіметпен бірлесіп оқушыларға, колледждер мен жоғары оқу орындарының студенттеріне арналған оқу құралдары әзірлену үстінде. Жалпы, қаржылық сауаттылық курстарында 90 күннен артық мерзімі өткен қарызы бар адамдарға басымдық беріледі.
Осы жылы Қызылорда облысында осы бастама аясында 8 мың азаматты оқыту жоспарланып отыр. Дүйсенбі күні Қызылорда қаласымен қатар Жалағаш, Сырдария, Шиелі және Жаңақорған аудандарында курстар басталды.
– Жоба қатысушылары қаржы кеңесшілері дәрістерінен бөлек, enbek.kz порталына тіркелу мен жеке кәсіп ашудан бастап, соттан тыс банкроттықты сүйемелдеу және берешекті өтеу кестесін жасау секілді мәселелер бойынша кеңес ала алады. Сондай-ақ оқу үдерісіне қатысушыларға заңгерлер де көмек береді. Елдегі азаматтар курсқа жазылу үшін «Amanat» партиясының қалалық немесе аудандық филиалына хабарласуға болады, дейді – партияның облыстық филиалының атқарушы хатшысы Ләйлә Төрешова.
Жұртшылыққа қаржы сауаттылығы курстарын өткізетін сарапшыларды партияның орталық аппараты арнайы оқудан өткізген. Облыста жоба аясында дәріс оқитын осындай 5 сарапшы бар. Олардың жетекшісі «Қарызсыз қоғам» жобасының Қызылорда облысы бойынша менеджері, сертификатталған тренер, ментор Наталья Мишукова.
– Жоспар бойынша биыл 8 мың адамды оқытуымыз керек. Оқумен қатар қала әкімдігінің жанынан ашылған фронт-офисте түрлі кеңес алып, кәсіппен айналысқысы келетіндерге бизнес-жоспар жасауға көмек беріледі, – дейді Наталья Мишукова.
Қатысушылар арасында әйелдердің көптігі байқалады. Солардың бірі – Айгүл Базарбаева. Алға қарай қарызсыз қадам басуды көздеген ол қалтаңдағы қаржыңды есептеп, жөн-жосықсыз несиеге ұрынбау үшін әр адамның осындай курстардан өткенін дұрыс деп санайды.
Облыс орталығы мен 4 ауданда қатар басталған қаржы сауаттылығы сабақтары алда Байқоңыр қаласы мен қалған үш ауданда да жалғасады.
Қызылорда
