Коллажды жасаған – Зәуреш СМАҒҰЛ ,«EQ»
Аталған байқау Түрікменстанның Ашғабад қаласында орнатылатын Абай ескерткішінің үздік жұмыс жобасын айқындау мақсатын көздейді. Доданың шығармашылық талаптарына келсек, ескерткіштің жұмыс жобасы тұлғаны тұрған бойы кейпінде бейнелеп, көркемдік деңгейі, эстетикалық мәнерлілігі, идеялық мазмұны жоғары, көркемдік тұтастығы мен бітімі ерекше болуы керек. Мүсін алыстан көз тартып, орналасатын жердегі көріністің басым композициясы ретінде қабылдануы да шарт. Ескерткіш ақынның кемел жасын бейнелеп, оның портреттік ұқсастығын қамтамасыз етуге тиіс.
Графикалық орындау әдістері – макеттің түсі, техникасы, материалы және мүсіннің эскизі автордың өз қалауы бойынша орындалады. Ескерткіштің материалы – қола. Ескерткіштің өзінің биіктігі – 4,5-5 м, тұғырдың биіктігі – 2,0-2,5 м.
Айта кетейік, конкурс материалдарын Монументтік өнер құрылыстарын орнату жөніндегі комиссия қарайды.
Авторлар конкурс материалдарын Мәдениет және ақпарат министрлігінің Мәдениет комитетіне 25 ақпанға дейін ұсынуы керек.
Мүсіншілер байқауы туралы толық ақпаратты Мәдениет және ақпарат министрлігінің сайтынан оқуға болады.
