Еңбек және халықты әлеуметтік қорғау министрлігінің бастамасымен былтыр ерекше қажеттіліктері бар адамдарға инватакси қызметін көрсету кезінде такси агрегаторларын пайдалануға мүмкіндік беретін қанатқақты жоба басталды. 2024 жылдың 1 ақпанындағы дерекке сүйенсек, Астана мен Алматы қалаларында аталған қызмет 9,9 мың рет көрсетілді. Ал өткен жылы мүгедектігі бар адамдарға инватакси қызметі 53,9 мың рет көрсетілгенін айта кеткен жөн.
Инватакси қызметін көрсету жылдамдығы мен сапасын арттыру мақсатында министрлік әкімдіктермен бірлесіп осы қызметтің тетігіне өзгерту енгізу туралы шешім қабылдаған еді. Өйткені бұған дейін азаматтарға қызмет алудан бір күн бұрын телефон арқылы жазылу қажет болатын. Бұл оларға өз сапарларын алдын ала жоспарлауға, инватаксиді күтуге мәжбүр ететін. Сондай-ақ инватакси қызметтерін көрсететін көлік құралдарының жетіспеушілігі сияқты мәселелер де болды.
Осынау келеңсіздіктерді реттеудің бір жолы – инватакси қызметіне такси агрегаторларын тарту. Мұндағы басты шарт – сапарлардың ақысынан пайыз ұстамау. Әдетте мұндай пайыз агрегатор платформаларының пайдасына аударылатын. Осы бастамаға қолдау білдірген «Яндекс» компаниясы жобаға өтеусіз негізде қатысуға ниет білдірді. Сонымен былтырдан бері мүгедектігі бар азаматтар Яндекс Go мобильді қосымшасы арқылы инватакси қызметін қолданып келеді. Бұл қызметті алушы үшін көлікті тезірек таңдауға, онлайн режімде тапсырыс мәртебесін қадағалауға және сапарларға мониторинг жасауға мүмкіндік береді. Аталған қосымшада мүгедектігі бар адамдар жүргізушіге сапардағы ерекше қажеттіліктері туралы ескертуі үшін арнайы мүмкіндіктер экраны іске қосылды. Өз кезегінде жүргізушілер адамды көлікке отырғызу және одан түсуде қалай көмек көрсетуге болатыны секілді арнайы нұсқаулар алады.
Қанатқақты жобаға алғашқы кезеңде Астана және Алматы қалаларынан мүгедектігі бар адамдардың фокус-тобы қатысады. Жоба 2024 жылы да жалғасып жатыр. Болашақта жаңа форматта қызмет көрсетуді мүгедектігі бар адамдардың басқа топтарына кеңейту және елдің барлық өңірінде қолдану жоспарланып отыр.
