Жаңашылдыққа жаны құмар Нұрдәулет Байханов мұнайлы өңірдегі орта мектепті бітірген. Ол құрастырған қосымшаның ерекшелігі көп. Біріншіден, ҰБТ сұрақтарына дайындалуға, екіншіден, сараптама жасауға, үшіншіден, жеке және топтық сайыс өткізуге, төртіншіден, оны тегін пайдалануға болады.
«ҰБТ-ға дайындалудың жүйкеге салмақ түсіретінін білемін. Сол себептен, бұл қосымша «100 мың оқушыға қалай көмектесе аламыз?» деген ізденістен туындады. Мақсатым – биыл 100 мың түлектің осы бағдарламаны пайдаланып, мемлекеттік грантпен жоғары оқу орындарына түсуіне көмектесу. Әр түлектің білімін жетілдіруіне кішкене болса да үлесімді қосқым келді», дейді Нұрдәулет Байханов.
Оның пікірінше, білікті маман атану үшін алдымен ҰБТ сынағынан жоғары балл алу қажет. Жастар мемлекеттік грантпен жоғары білім алып, маман атанса, еліміздің әлемдік деңгейге танылуына үлесін қосар еді.
«Шоқан Уәлихановтың «Халықтың кемеліне келіп, өркендеп, өсуі үшін ең алдымен азаттық пен білім қажет» дегенін ұдайы жадымда ұстап жүремін. Мен де елімнің дамуына үлесімді қосып, халқымыздың жағдайы жақсарғанын қалаймын», дейді жаңашыл студент.
Талапты жастың айтуынша, UNAI қосымшасын пайдалану үшін App Store және Play market бағдарламасы арқылы жүктеу керек. Қосымшаға тіркелген соң, бастапқы беттегі «Ойнау» батырмасы арқылы бірден ҰБТ-ға дайындықты бастауға болады. Ал арнайы нұсқаулықты unai.kz Instagram немесе TikTоk парақшасынан көруге мүмкіндік бар.
Атырау облысы
