Кітап оқу – бос уақытты қызықты өткізу ғана емес, тұлға болып қалыптасуға орасан көмегі тиетін өте пайдалы іс. Аталған іс-шараға қоғам қайраткерлері, ғалымдар, мұғалімдер мен кітапханашылар қатысып, кітап оқудың маңыздылығы жөнінде ой бөлісті. Көркем шығарма оқудан бәсекеге еліміздің түкпір-түкпірінен 3 500 ұстаз қатысты. Солардың арасынан он роман бойынша он эссе жазып, үздіктер қатарына іліккен 50 ұстаз Астанаға шақырылып, марапатталды. Мәселен, олар І кезең бойынша Д.Исабековтің «Гауһар тас» повесін, Ш.Мұртазаның «Ай мен Айша» романын, Ә.Нұршайықовтың «Ақиқат пен аңыз» романын, И.Тургеневтің «Әкелер мен балалар» романын және Ш.Айтматовтың «Қош бол, Гүлсары!» повесін оқыған. Қатысушыларға әр кітаптан 2 сұрақ беріліп, оның әрқайсысына кемі 200 сөзден тұратын эссе арқылы жауап берген.
Байқаудың ІІ кезеңінде қатысушылар Б.Соқпақбаевтың «Балалық шаққа саяхат», М.Әуезовтің «Қилы заман», Б.Майлиннің «Күлпәш», А.Сент-Экзюперидің «Кішкентай шахзада», О.Бальзактың «Жергілікті дәрігері» сияқты шығармаларын оқыған. Бұл кітаптардың бәрі «Қасым» баспасының өнімі екенін атап өткен жөн.
Бір жылға созылған байқау нәтижесінде 3 500 қатысушының арасынан 50 ұстаз «Үздік оқырман» деп танылса, 12 қатысушы ІІІ орын, 6 қатысушы ІІ орын иеленіп, 2 қатысушы І орынға лайық деп танылып, дипломдар мен ақшалай сыйақы жеңіп алды. Мұнан бөлек 30 қатысушыға ынталандыру сыйлығы мен қаржылай сыйақы тапсырылды.
