Фото: ru.sputnik.kz
Мемлекет басшысы Үкіметтің кеңейтілген отырысында автожол мәселесіне айрықша көңіл бөлді. «Жалпы, жол мәселесіне келгенде бір ғана мақсат болуға тиіс. Республикалық немесе аймақтық жол болсын, еліміздегі жолдың барлығы сапалы болуы керек. Әзірге жағдай мәз емес», деп баға берді Қасым-Жомарт Тоқаев.
Жағдайы мәз емес жолдың бірі – жоғарыдағы шекаралы аймаққа жеткізетін «Алматы-Кеген-Түп» бағытындағы республикалық маңызға ие ойдым-ойдым жолдан жолаушы жүйкесі түгілі, тоңқаңдаған көліктің де темірі тозып болды. Темірдің тозғаны былай тұрсын, сапасыз жол талайдың тағдырын тас-талқан етіп, дәм-тұзын тауысты. Таулы өңір тұрғындарының жанайқайына халық қалаулылары да қарап қалмай, өзіндік үн қосып келеді.
Мәжіліс депутаты Жанарбек Әшімжан Көлік министрі мен Сыбайлас жемқорлыққа қарсы іс-қимыл агенттік басшысына жолдаған депутаттық сауалында сапасы сын көтермейтін жолдың бүгінгі ахуалын атап айтты. «Бұған дейін де Мемлекет басшысы Қазақстандағы жолдарды «құрақ көрпеге» теңеген еді. Әлі күнге дейін жол саласында салғырттықтар аз емес. «Жол азабын жүрген біледі», осы орайда сол азапты күндерді бастан кешіп жатқан Алматы облысы Кеген, Нарынқол, Ұйғыр аудандарындағы елдің жанайқайын жеткізгім келеді. Бұрын да айтқанмын, тағы да айтуға тура келіп тұр. Өйткені нәтиже жоқ», деген мәжілісмен сапасыз жол салып, миллиардтарды желге ұшырған «ҚазАвтоЖол» ұлттық компаниясын сынға алды.
Жолаушылар төзімін тауысып, сыздауықтай солқылдатып тұрған жол мәселесіне Мемлекет басшысының баса назар аударуы, депутаттардың қозғау салуы жылдар бойы жанға батқан мәселелердің түйінін тарқатуға, өңіріміздегі жол жағдайының жақсаруына ықпалы тиер деген үміттеміз.
Сабыр ДОСЫМБЕКОВ,
Кеген аудандық ардагерлер
кеңесінің төрағасы
Алматы облысы
