Аталған жарысты Қазақстанның ойыншылары жеңіспен бастағаны жайында біз бұған дейін жаздық. Топтық турнирдің бірінші турында ерлер командасы Сауд Арабиясына (3:0) сан соқтырса, әйелдер құрамасы Аустралиядан (3:2) айласын асырды. Келесі күні жерлестеріміз 2016 жылғы әлем чемпионатының қола жүлдегері Англияға қарсы ойнағанда Қазақстанның Корея Республикасындағы Төтенше және өкілетті елшісі Нұрғали Арыстанов бастаған бір топ лауазым иелері спортшыларды қолдау мақсатында аренаға арнайы келді. Алайда азулы ағылшындарға әліміз жетпеді. Кирилл Герасименко Пол Дринхолл мен Лиам Питчфордты ұтқанымен, Алан Құрманғалиев пен Айдос Кенжеғұлов қарсыластарына есе жіберді. Есеп – 2:3.
Үшінші күні жігіттер Олимпия ойындары (3 қола) мен әлем чемпионаттарында (7 күміс, 2 қола) атой салып жүрген Германиямен күш сынасты. Бұл кездесу біздің жігіттер үшін сәтті басталды. Герасименко Олимпиаданың алты (2 күміс, 4 қола), әлем чемпионатының бес (4 күміс, 1 қола) дүркін жүлдегері, Еуропа ойындары (3 алтын), құрлық чемпионаты (10 алтын,3 күміс, 2 қола ) және Әлем кубогінде (1 алтын, 4 қола) сан мәрте атой салған даңқты Дмитрий Овчаровтан 3:1 есебімен басым түсті. Барша мамандар бұл нәтижені сенсацияға балады.
Көп кешікпей Герасименко командалық сайыста әлем чемпионатының күміс жүлдегері, жекелеген бәсекеде Еуропаның үш дүркін чемпионы, Еуропа ойындарының екі мәрте жеңімпазы Цю Даннан 0:2 есебімен ұтылып жатса да, салы суға кеткен жоқ. Керісінше, шешуші ойындарға ол ширығып шықты. Соңғы үш партияда қарқынын күрт күшейткен еліміздің бірінші ракеткасы жеңісті қарсыласының уысынан жұлып алды – 3:2. Бірақ Кириллдің жеңісті жолын командалық әріптестері жалғастыра алмады. Нәтижесінде, немістердің асығы алшысынан түсті. Қорытынды есеп – 2:3.
Төртінші турда кілең легионерлерден жасақталған АҚШ құрамасымен айқастық. Бұл жолы да асқан шеберлік танытқан Герасименко Сид Нареш пен Никхил Кумарды қапы қалдырды. Кенжеғұлов Лишан Лианнан басым түсті. Құрманғалиев Кумардан ұтылды. Осылайша, жерлестеріміз бұл бәсекені 3:1 есебімен өз пайдасына шешті. Нәтижесінде, Қазақстанның үстел теннисшілері 2 топта екінші орынды иеленіп, жарысты одан әрі жалғастыру құқығына ие ТОП-24 команданың қатарына қосылды. Біз тек Германиядан ғана қалып қойдық. Енді отандастарымыз 1/8 финалға шығу үшін Үндістанмен кездеседі.
Ал еліміздің әйелдер құрамасының жағдайы мәз емес. Чемпионаттың тұсаукесер кездесуінде Аустралиядан (3:2) айласын асырған олар екінші турда Аустрияға есе жіберді. Бұл ойында Зәуреш Ақашева София Полкановаға (Еуропаның екі дүркін чемпионы), Сарвиноз Мірқадырова Лю Цзяге (Европа чемпионы, алты Олимпиадаға қатысушы) және Анастасия Лаврова Каролина Мишекке жарытып қарсылық көрсете алмады – 0:3. Гонконгқа қарсы кездесуде дәл сондай есеппен аяқталды – 0:3. Олимпия ойындары мен әлем және құрлық біріншіліктерінде талай рет жеңіс тұғырына көтерілген Чжу Чэнчжу, Ли Хо Чин және Ду Хойкем сынды мықтыларға Сарвиноз Мірқадырова, Ангелина Романовская және Әнел Бақыттың әлі жетпеді. Топтық турнирдегі соңғы ойынды Португалияға қарсы өткізіп, Пиреней түбегінің өкілдерінен таза жеңілдік – 0:3. Сөйтіп, бұрымдыларымыз өз тобында төртінші орында қалып қойды.
