Қоғам • 25 Ақпан, 2024

Жетісудың кітап керуені

121 рет
көрсетілді
4 мин
оқу үшін

Жақында жетісулық бір топ қаламгердің баспадан жаңа шыққан кітаптары Алматыдағы Ұлттық кітапханаға тарту етілді. «Жетісу: кітап керуені» жобасы аясында ұйымдасқан кешке біз де куә болдық.

Жетісудың кітап керуені

Игілікті іс-шарада 2006 жылдан бастап Алматы облысы әкімінің қолдауымен шық­қан, кейінгі жылдары Же­тісу облысының әкімінің бас­тамасымен жарық көрген қа­лам­герлер мен сазгер, су­рет­шілердің 300 дана кітабы Ұлт­тық кітапханаға сыйға тарту рәсімі атқарылды. Ха­лықаралық кітап сыйлау күні аясында өткен маңызды іс-шара жерлес ақын-жазушыларымыздың шығармаларын әдеби өмірі қайнап жатқан Алматы қала­сының оқырмандарына таныс­тыруды, насихаттауды мақсат етті. Оқырман қызығушылығын оятқан бұл басқосуға облыстық мәдениет, архивтер және құ­жаттама басқармасы мен атал­ған басқармаға қарасты С.Сей­фул­лин атындағы облыс­тық кі­тапхана ұжымы ұйытқы болды.

Жиналғандар жетісулық ақын-жазушылардың кітаптары қойылған көрмемен таныс­қан­нан кейін, басқарма басшысы Қуаныш Сүлейменов сөз алды.

«Таралымы 500 дана, ең көп болғанда 1000 данадан аспайтын бұл кітаптар негізінен облыс аумағымен ғана шектеліп, аудан-ауылдарға ғана таратылатын. Яки шығармашылықтары біртіндеп шарықтап келе жат­қан ақын-жазушылар өзге өңірлерге танылмай көп ретте өз қазандарында өздері қай­нап жататын. Әуелі Астана қаласына жол бас­тап, артынан Алматыға ат басын тіреген «Жетісу: кітап керуені» жоба­сының мақсаты да осындай олқылықтың орнын толтыру. Сондай-ақ жетісулық таланттарды басқа өңірлердің оқырмандарына таныстыру. Бұл мақсат белгілі бір мөлшерде орындалды деп айтуға болады. Соған орай осы бағыттағы іс-шаралар алдағы уақытта да жүйелі түрде жалғасады», деген Қ.Сүлейменов көр­кем әдебиет және өнер саласы бойын­ша жарық көрген кітаптарды Ұлт­тық кітапхана қорына сыйға тартты.

Шынында өңірде ақын-жазу­шылар мен басқа да өнер адамдарының шығармашы­лығына қолдау көрсету бағы­тында жүзеге асып жатқан нәтижелі жұмыстар жетерлік. Жетісуда облыс әкімінің қол­дауымен жүздеген кітап жа­рыққа шығып, бәрінің тұсау­кесер рәсімдері өткізілді. Ақын-жазушылардың, әнші-саз­герлердің ұйымдасқан шы­ғар­машылық кештері қаншама!?

Алматы қаласына кітап ке­руенімен бірге талды­­қор­ған­дық ақын-жазушы­лары мен өнер адам­дарының бір шоғыры келген еді. Оларды алматылық қаламдастары қарсы алып, басқосу барысында кітап жайлы өрелі әңгіме өрбітті.

Жиналғандар алдында ақын, халықаралық «Алаш» әдеби сый­лығының лауреаты Әміре Әрін мен Халықаралық Түрксой Жазушылар одағы­ның төрағасы, Мем­лекеттік сыйлықтың лауреа­ты, ақын Ұлықбек Есдәулет, жазушы, Қазақстанның ең­бек сіңірген қайраткері Әли Ыс­қабай, Қазақстанның ең­бек сіңірген қайраткері, мә­дениет саласының ар­дагері Елеусіз Жанпейісұлы, ақын, халықаралық «Алаш» әдеби сый­лығының лауреаты Бақыт Беделхан, ақын Нүсіпбай Әбдірахым сөз алып, жиналған оқырманға ізгі тілектерін ар­нады. Сөз орайы келгенде ақын Қуат Қайранбаев жерлестерімен жолығысу қуанышына орайластырып «Талдықорғанды аңсау» деген өлеңін оқып берді.

Кітап мерекесінде жеті­сулық жазушы, Қазақстан Жазушылар одағының мүшесі Бақыт Мерекенованың «Ал­тын бесік», көрнекті сазгер Әли Ал­пысбайдың «Са­ғым», ақын Жангелді Немере­бай­дың «Арман аялдамасы» кі­таптарының тұсауы кесілді. Одан кейін Ұлттық кітапхана директоры Бақытжамал Оспанова өздерінің айырбас-резервтік қорынан 2000 дана кітапты Жетісу кітапханаларына сыйға тартты. Қомақты сыйлықты облыстық кітапхана директоры Самал Шаяхметова қабылдап алды.

Әсерлі басқосуда Қазақ­станның халық әртісі Рамазан Стамғазиев пен белгілі дәстүрлі әнші Нұржан Жанпейісов әннен шашу шашса, Д.Рақышев атын­дағы Жетісу облыстық фи­лар­мониясының «Күреңбел» триосы өнерімен тәнті етті.

 

Жетісу облысы