Суретте: доп ойнаған депутаттар
«Барлық деңгейдегі мәслихаттардың депутаттары мен қызметкерлері, партия филиалдарының өкілдерінен құралған 10 команда бас жүлде үшін бәсекеге түсті. Тартысты ойынның куәсі болдық. Әрбір ойында бәсекелестік жоғары болды. Біріншіден, бұл қатысушылар үшін жұмыстан тыс уақытта пайдалы басқосу әрі депутаттар арасында достық қарым-қатынас орнату болса, екіншіден, саламатты өмір салтын қалыптастыруға бағытталған. Бұдан бөлек, көктемде волейболдан турнир ұйымдастыруды жоспарлап отырмыз», – дейді облыстық партия филиалының төрағасы Қуат Байғожаев.
Жарыс қорытындысы бойынша бас жүлдені Қарасай аудандық мәслихат депутаттары жеңіп алса, екінші орынды Еңбекшіқазақ, ал жүлделі үшінші орынды Кеген аудандық мәслихат депутаттарынан құралған командалар иеленді.
Бұдан бөлек, 5 аталым бойынша үздік ойыншылар марапатталды. Жалпы ойынның қорытындысы бойынша Қарасай аудандық мәслихат депутаты Бекжан Сүнбеков қарсыластар қақпасына 13 гол соғып, турнирдің «Үздік сұрмергені» атанды. Ал 62 жастағы Еңбекшіқазақ аудандық мәслихат төрағасы Бекет Ахметов «Үздік ойыншы» аталымы бойынша марапатталды.
«Әдемі, әсерлі, қызықты ойын болды. Біз өте мықты қарсыластармен бақ сынастық. Ойын командалық рухты көтерді. Чемпионат саламатты өмір салтын ұстанып, спортпен шұғылдануға шақырады. Депутаттардың өзара ынтымақтастығына ықпал етеді», – дейді Бекет Ахметов.
Сонымен қатар «Үздік қақпашы» аталымы Райымбек аудандық мәслихаты аппаратының қызметкері Рашид Зординовқа, «Үздік қорғаушы» – Қарасай аудандық мәслихат депутаты Абылай Зуайдаға және «Үздік шабуылшы» – Кеген аудандық мәслихаты аппаратының қызметкері Ернұр Сабырбековтің еншісіне тиді.
Алматы облысы
