Қарияның ахуалын жақсартқан операция

Ми тамырларының аневризмасына өте білікті, тәжірибесі толысқан мамандар ғана операция жасай алады. Себебі бұл заманауи медициналық жабдықтарды қажет ететін ең күрделі хирургиялық араласулардың бірі саналады. Мамандардың айтуынша, мұндай күрделі операциялар ақылы түрде жүргізілсе, оның құны шамамен 10 млн теңгеден асады екен. Науқас операцияға квота бойынша келіп, хирургтер міндетті әлеуметтік меди­цина­лық сақтандыру аясында операцияны тегін жасаған.

Теміртаудан келген пациенттің айтуынша, 2023 жылдың жазынан бері басы қатты ауырып, көруі әлсіреп, сол көз­дегі қозғалыстың шектелуі ма­за­­ла­ған. Сондай-ақ жоғары қабағы түсіп кетіпті. Дәрігерлер МРТ және селек­­тивті церебральды ангиографияға түсі­ріп, пациентте мидың көптеген аневриз­маларын, сол жақ ішкі ұйқы артерия­сының кавернозды-паракли­ноидты сегментінің 50,3-48,2 мм көлем­дегі фузиформды аневризмасын, оң жақ ішкі ұйқы безінің параклиноидты сег­менті артерияларияларының 16,5-14,5 мм көлемдегі кездейсоқ фузиформды аневризмасын анықтаған.

Өте көлемді аневризма бар пациент­тің клиникалық және неврологиялық с­татусын ескергенде, аневризманың жа­­рылу қаупі өте жоғары болыпты. Сон­­дай-ақ аневризманың эмболизация­сы ке­зінде тамырдың окклюзиясының қаупі жоғары еді. Консилиум кезінде осы­ның барлығын қаперге алған Ұлттық нейрохирургия орталығының Тамырлы және функционалды нейрохирургия бөлімшесінің дәрігерлері операцияны екі кезеңде жүргізу туралы шешім қабылдайды.

Операцияның бірінші кезеңі был­тыр қарашада өткен. Ол кезде дәрі­гер­лер сол жақ ортаңғы ми артерияла­ры­ның фронтальды және париетальды тар­мақтары мен М3-М4 сегменттері ара­сын­да протективті экстракраниал­ды микроваскулярлық анастомоз жүр­гізген. Бұл – сол жақ ішкі ұйқы арте­риясын микро спиральмен өшіру­дің рентгендік-тамырлы әдісі. Опера­ция­­дан кейін пациенттің жоғары қабағы­ның түсіңкірегені (птоз) қайтып, невро­логиялық статус жақсарған.

Бірнеше күн бұрын пациентке опе­рацияның екінші кезеңі – оң жақ іш­кі каротид артериясының парак­ли­ноид­­ты сегментінің фузиформ­ды анев­риз­масының рентгендік эндо­васкуляр­лық эмболизациясы телес­копиялық ағынды қайта бағыттаушы стенттерді қолдану арқылы жүргізілді.

Пациент қазір өзін әлдеқайда жақсы сезінеді. Операция нәтижесіне риза.

– Маған операция жасаған барлық дәрігерге алғыс айтамын. Қарағандыда маған операция жасалмады. Жағдайым ауыр болған соң осы орталыққа жіберді. Мен осы жерде ем қабылдағаныма ризамын. Қазір бәрі жақсы. МӘМС жүйесінің арқасында барлық емшара, тексеру-зерттеулер, операция тегін жасалды. Бәріне алғысым шексіз, – дейді пациент Нақыпбек Данбаев.

Операцияны Тамырлы және функционалды нейрохирургия бөлімшесінің жетекші нейрохирург дәрігері Шың­ғыс Нұриманов жасаған. Нейрохирург дәрігер Ш.Нұримановтың айтуынша, көп жағдайда аневризма байқалмайды. Әрі адам кез келген уақытта өліп кетуі мүмкін екенін білмей, жылдар бойы өмір сүре алады екен.

– Аневризма жарылғанға дейін адам қолайсыздық пен мазасыздық бел­гілерін сезінбейді. Сондықтан ауруды ерте сатысында анықтау үшін адам кем дегенде бір рет МСКТ, яғни муль­­ти­­спиральды компьютерлік томогра­фия жасату қажет, – деп кеңес айтты нейро­хирург-дәрігер.

Ми тамырларының аневризмасына операция жасау мамандардың жоғары біліктілігін және заманауи медициналық жабдықты қажет ететін ең күрделі хи­рур­гиялық араласулардың бірі саналатынын айттық. Бұл күн сайын МӘМС шеңберінде жасалып жатқан күрделі операциялардың бірі ғана.