Мемлекеттік рәміздерді жаппай насихаттау жұмыстарын жүргізу – жауапты іс. Ұлттық рәміздердің идеологиялық мәні зор екенін ескере отырып, оларды барлық деңгейде дәріптеп, танымалдығын арттыру мақсатында патриотизмді насихаттау жөніндегі 2024 жылға арналған тізім де бекітілді.
Мұндағы басты мақсат – жастарға патриотизм идеясын насихаттау, тарихты, ерлікті қастерлеп, ел тұлғаларын асқақтату.
Халқымыздың әйгілі перзенттеріне құрмет көрсету – парызымыз. Солардың бірі – мемлекеттік Тудың авторы, суретші, дизайнер Шәкен Ниязбеков. Биыл Талғат Мұсабаевтың тұңғыш рет мемлекеттік Туды ғарышқа алып ұшқанына 30 жыл толады. Сондай-ақ жазушы-публицист, геральдика саласының зерттеушісі Ербол Шаймерденовтің туғанына – 70 жыл. Қазақтың әйгілі кескіндемешісі, график-суретші, бейнелеу өнерінің негізін салушылардың бірі Әбілхан Қастеевтің 100 жылдық мерейтойы.
Осыған орай «Туымыз – төрімізде» атты жалпыұлттық акция, жастарды патриоттыққа баулуды көксеген «Отанды сүю – жүректен» қанатқақты жобасын іске асыруды, «Жетістігім – тәуелсіздігімнің жетістігі» атты түрлі этнос өкілдерінің жастармен кездесуін ұйымдастыруды қолға алдық. Мемлекеттік рәміздер күніне орай «Көк тудың желбірегені» атты патриоттар форумын, мемлекеттік Туды салтанатты көтеру рәсімін, «Патриотизм дауысы» арқылы мемлекеттік Гимнді насихаттауды, Ш.Ниязбековті еске алуға арналған суретшілер арасында шығармашылық байқау ұйымдастыруды жоспарлап отырмыз.
Енді барлық орта және арнаулы білім беру мекемелерінде әр дүйсенбі бір уақытта мемлекеттік Гимн орындалады. Білім беру мекемелерінде аптасына бір рет патриоттық рухты дәріптеуге арналған сабақ өткізіледі. Білім беру мекемелеріндегі «Жас ұлан» ұйымдары үздік оқушыларға мемлекеттік Елтаңба бейнеленген төсбелгілерді табыстайды. «Туым – мақтанышым!» атты патриоттық диктант-конкурс ұйымдастырылмақ.
Мәдениет саласындағы музей, кітапхана, театр, клуб, филармония, халық шығармашылығы орталықтарында мемлекеттік рәміздерге арналған жүйелі патриоттық бағытта іс-шаралар өткізіледі. Сонымен қатар телеарналар мен радиоларда «Мемлекеттік рәміздер күнін мерекелеуді қалай жоспарлап отырсыз?» тақырыбында блиц-сауалнамалар жүргізіп, әлеуметтік желілерде бір уақытта мемлекеттік Тудың фотосын жариялап, «Туым – мақтанышым!» жалпыұлттық челлендж өткізіледі.
Ұлттық құндылықтар ұлтты құрметтеуден басталады. Ұлтты құрметтеу – барша ұлттық құндылықтарды дәріптеу, құрмет көрсету, сақтау деген сөз. Ал ұлтсыздану ұлтты, мемлекетті әлсіретеді. Қоғам дамуын тежейді. Бұл – тарихи шындық. Сондықтан тарих, замана алдындағы ұлы сынақ кезінде біз таңдауымызды жасадық. Әлемдік озық құндылықтарды игере отырып, оны ұлттық құндылықтарымызбен байыту – жасампаздықтың жолы.
Руслан ХАМЗА,
Мемлекеттік рәміздерді насихаттау жөніндегі ұлттық орталықтың атқарушы директоры
