Құқық • 28 Ақпан, 2024

Шектен шыққан шетелдіктер

124 рет
көрсетілді
2 мин
оқу үшін

Еліміздің көші-қон заңдылығын бұзатын шетелдіктер әбден шектен шықты. Атыраулық полиция қызметкерлері өткізген «Мигрант» жедел алдын алу іс-шарасы кезінде заңсыз жүрген өзге мемлекеттердің азаматтары ұсталды. Еліміздің заңын ерен санамаған шетелдіктердің арасында Ауғанстан мен Бангладеш Республикасының алты азаматы бар.

Шектен шыққан шетелдіктер

Атырау облыстық полиция департаменті баспасөз қыз­метінің мәліметінше, алыс­тағы шетелдердің азаматтары 2023 жылдың қазан – жел­тоқсан айлары аралығында Қазақстан аумағына сауда-саттық, маркетинг жүргізу мақсатымен келіп, Алматы және Қостанай қалаларына барғаны анықталған. Алай­да олар виза мерзімі өтке­ні­мен, ел аумағынан шықпай қал­ған. Осыған байланысты сот шешімімен төрт шетелдікке айыппұл салынды. Екі аза­маттың визасы жарамсыз деп танылды. Көші-қон заң­на­масының талаптарын бұзған олардың бәріне Қазақстан Республикасының аумағынан кетуге шығу визасы берілді. Енді олар еліміздің шекарасынан 15 күннің ішінде шығып кетуі керек.

Мұнайлы өңірде 19 ақ­пан­нан бері «Мигрант» же­дел профилактикалық іс-ша­расы өтіп жатыр. Оның мақ­саты – көші-қон заң­дылы­ғын бұзған шетел азаматтарын анықтау, ел аумағынан өз еркімен кету туралы сот қау­лысын орындамаған ше­тел­діктерді мәжбүрлі түрде шығару. Үш күнде Атырау қаласының аумағында заң­сыз жұмыс істеп жүрген 50-ден аса шетелдік анықтал­ды. Өзге елдің азаматтарына қа­тысты Әкімшілік құқық бұзу­шылық туралы кодексі 517-бабының 5-тармағымен (Шетелдіктің немесе аза­мат­тығы жоқ адамның жүзеге асы­ратын қызметі визада көр­се­тілген мақсаттарға сәй­кес болмауымен көрінген, Қазақ­стан Республикасының халық­тың көші-қоны саласындағы заңнамасын бұзуы немесе жергілікті ат­қа­рушы орган өз бетінше ­жұ­мысқа орналасуға рұқсат­ты алу еңбек қызметін жүзеге асыруы) әкімшілік хат­та­ма­лар толтырылды. Жи­нақ­тал­ған іс құжаттары сотқа жол­данды.

Шетелдіктер заңыз жүр­ге­німен қоймай, алкогольдік ішімдік ішіп, мас күйінде көлік жүргізетінді шы­ғарды. Полиция қызмет­кер­лері 20 ақ­панда Атырау қаласындағы И.Тайманов даң­ғылы бойында «Chevrolet Cobalt» маркілі автокөлігін тоқ­­татты. Тексеру кезінде кө­­лік­тің Өзбекстан Респуб­ли­ка­сында тіркелгені анық­тал­ды. Ал көлікті аталған ел­­дің 1989 жылғы тұрғыны мас күйінде жүргізгені дәлел­ден­ді. Оған қа­тыс­ты Әкімшілік құқық бұзу­шы­лық туралы кодексі 608-ба­бы­ның 1-бөлігімен (Жүр­гі­зушінің көлік құра­лын ал­ко­голь­дік, есірткілік және (не­месе) уытқұмарлық масаң күй­де басқаруы, сол сияқты кө­лік құралын алкоголь­дік, есірт­кілік және (немесе) уыт­құмар­лық масаң күйдегі адамның басқаруына беру) әкімшілік хаттама толтырылды.

 

Атырау облысы