ҰСТАМДЫЛЫҚ ҰЛАҒАТЫ ӨЗІНЕ ДЕ, ХАЛҚЫНА ДА АДАЛДЫҚ

Ел халқы Елбасының шешімін осылай бағалап отыр Аз уақыттың ішінде қол жет­кіз­ген жүз жылдыққа татырлық жетіс­тік­теріміздің басы-қасында қозғау­шы, дем беруші болып Тұңғыш Пре­зидентіміз – Нұрсұлтан Әбіш­ұлы жүр. Ол елімізге тап болған ке­шегі аумалы-төкпелі, өтпелі кезеңде, халқымыздың бағына орай, ел би­лігін өз қолына алды. Әрі осы сыни шақтан елін жаңылдырмай, сүрін­дірмей алып шықты. Соңғы кезде Президент Нұр­сұл­тан Назарбаевтың елдің ішкі және сыртқы саясатын жүргізудегі көш­бас­шылық рөлі туралы отандастар да, шетелдік сарапшылар да айтып, жазып жүр. “Ел Басы” туралы мә­селе Парламенттің екі палатасында қаралып, мақұлданды. Елбасының мәртебесі туралы заң жобасы қос палата депутаттарының талқысынан өтіп, Елбасының бекітуіне жіберілді. Бүкіл ел болып, Президенттің ше­шімін күттік. Енді, міне, Нұр­сұлтан Әбішұлы өзіне жолданған заңдарға жауап беріп, өз ұстанымын депутаттарға немесе “Нұр Отан” партиясының Саяси бюросына ғана емес, бүкіл қазақстандықтарға мә­лім етті. Елбасы ұсынылған заң­дарға қол қоюдан бас тартты. Ха­лық­тың қоше­метін, өзінің мәр­тебесін заң арқылы бекітудің жөні жоқ деп тапты. Елбасы өзіне де, халқына да сенеді. Елдің, халықтың үмітін ақтау үшін арнайы қарар қабылдаудың қажеті жоқ деп біледі. Қызметтестермен, әріптестер­мен, жолдастармен өзара әңгімеде тап осындай шешім болар деп күткен едік. Жауап ойымыздан шықты. Нұрсұлтан Әбішұлы тағы да өзінің парасаттылығын, көреген­ді­гін, тәжірибелі-майталман саясат­кер екендігін, мемлекеттік, тіпті жалпы­адам­заттық категориялармен ой­­лай­тынын танытты. “Мен әрқа­шан түрлі мақтау мен мадақтан биік тұ­руға тырысамын және осы ұста­ным­да қала беремін”, – деп атап көр­сетті Елбасы өзінің халыққа арнауында. Елбасының осы шешімі елімізге, бүкіл қазақстандықтарға абырой болды деп білеміз. Біз осындай кең және әріден ойлайтын дана бас­шы­мыз­дың барлығына ризашылық біл­діреміз. Нұрсұлтан Әбішұлы мем­ле­кет мүддесін, халықтың жағдайын бәрінен де биік қоятынын тағы да айғақтады. Өз арнауында Нұрсұлтан Әбіш­ұлы қоғамдық пікірде берік қа­лыптасқан “Ел Басы” мәртебесін заңдастыру туралы Парламенттің шешімін түсіністікпен қабылдай­ты­нын және осы мәртебені қабылдау туралы тілек айтып хат жолдаған қа­зақ­стандықтарға шынайы алғы­сын білдіретінін айтты. Бірақ, Елба­сы­ның пікірінше, мұндай мәртебені тек заңдармен, декреттермен немесе өзге де құқықтық актілермен белгілеуге болмайды. Бір айта кететін нәрсе – баспасөз бетінде қылаң беріп қалған Ұлт көш­басшысы туралы идеяны орынсыз деп есептеудің немесе ол халықты әрі-сәрі күйге түсіріп, елдегі тұрақ­ты­лыққа нұқсан келтіреді деп ойлаудың реті жоқ. Негізінде осынау идеяда де-факто болған жағдайды де-юре жағдайына келтіру, яғни заңдастыру керек деген мағына жатыр. Нұр­сұлтан Әбішұлы, шы­нын­да да, елімізде ғана емес, ТМД ел­дерінде, тіпті дүние жүзінде та­ны­мал болып табылатын көшбасшы. Бұл – отандастарымыздың ғана емес, шетелдік сарапшылардың да пікірі. Елбасы өзінің арнауында елде әртүрлі пікірлер туғызған мәселе жө­нінде, еліміздің жағдайы, алда тұр­­ған ұлан-ғайыр міндеттер жө­нін­де өз ойын ашық әрі түсінікті етіп жет­кізген. Ештеңені бүгіп қалған жоқ. Отбасының мүшелері туралы айтқа­ны да көңілге қонады. Елбасы өзі үшін де, отбасының мүшелері үшін де барша қазақстандықтардан бөлек ерекше артықшылықтар не­месе жеңілдіктер талап етпейді. Бәрі де бұлжымас заңға бағынуы тиіс. Күйеу баласы туралы айта келіп, оның шектен шыққан қылығы Ел­басы үшін де, оның отбасы үшін де орасан қасірет болғанын жасыр­майды. Ашықтық туралы бір кезде қайта құру тұсында көп айтылып еді. Қазір бұл мәселе тасада қалып жүр. Дұры­сында ашықтық, жариялылық – демократиялық қоғамның айқын көрінісі. Осы жағынан да Прези­дент­тің арнауы бәрімізге сабақ болар үлгі іспеттес. Біз, ұстаздар қауымы, жастары­мызға үлгі болар істерге, тұлғаларға, олар­дың кісілік қылықтарына ерекше мән береміз. Сондай сөзімен де, ісімен де, болмыс-бітімімен де бәрімізге тірі үлгі болып келе жатқан бірден-бір тұлға – Елбасымыз болып табылады. Біз Президенттің ісі де, жолы да, бетке ұстаған бағыты да дұрыс деп есептейміз. Демек, Президентімізбен бірге біз ойлаған мақсатымызға жетеміз. Біздердей ұстаздарды елдегі істің жайы, ішкі және сыртқы саясаттың жүзеге асуы ғана қызықтырып қоймайды. Бұл арадағы жетістіктер біздердің және студент жастарымыздың көңіл күйін көтеріп, болашаққа сенімімізді арттырады. Сонымен бірге, біз үшін қымбат нәрсе – Елбасының осындай тосын шешімдері, таңдауы. Ғалым ретінде, жоғары оқу ор­нының ректоры ретінде айтарым – елімізде бұрын да, қазір де оқимын, өсемін, жетілемін деген студент­тер­ге, ұстаз деген, ғалым деген атымды ақ­таймын деген оқытушыларға қа­жетті жағдайлардың бәрі жасалған. Елде білім мен ғылым саласына ерекше көңіл бөлініп келеді. Бізде интел­лек­туалды ұлт болып, интел­лектуалды ұр­пақ тәрбиелеуге, сөйтіп, Прези­дент­тің тапсырмасын орындап шығуға қажетті алғышарттардың бәрі бар. Орыс тілінде адам туралы сөз болғанда кейде “самодостаточный человек” деген сөз тіркесі қолда­ны­ла­ды. Біздің философтар оны “то­лық адам” деп аударып жүр. Нұр­сұлтан Әбішұлы – сондай толық адам. Ол кісіде адамға, атап айт­қан­да, көшбасшыға қажет қасиеттердің бәрі бар. Абай айтқандай, “ыстық қайрат, нұрлы ақыл, жылы жүрек”, ерік-жігер, біліктілік, көрегендік, кемеңгерлік, елжандылық, табан­ды­лық. Біз тек Елбасына ойға алған істерінің барлығын орындауға ұзақ ғұмыр берсін деп тілейміз. Қазыбай БОЗЫМОВ, Жәңгір хан атындағы Батыс Қазақстан аграрлық-техникалық университетінің ректоры, ауыл шаруашылығы ғылымдарының докторы, профессор. ОРАЛ. БАСҚАША БОЛУЫ МҮМКІН ЕМЕС ЕДІ Мемлекет басшысы Нұрсұлтан Назарбаевтың Тұңғыш Президент, Ұлт көшбасшысы туралы Заңнамаға қол қоймауы көпшіліктің Пре­зидентке деген сенім-ілтипатын арттырғаны сөзсіз. Өйткені, Елбасы – ешбір заңдық күші бар атақ-дә­режесіз-ақ әр істе халық көңілінен шығып, әлем жұртшылығы мойын­даған тұлға. “Отанды сүю – иманнан” дейді қасиетті хадис. Қазір бізге керегі имандылық, мұсылман­шылдық, алдымен жүрек иманды болуы керек. Біздің қазақ тарихында сөз бас­таған шешенге, ел бастаған көсем­ге, қол бастаған батырға атақты қара­пайым халық берген. Әне, Ақан серінің Құлагеріне ескерткіш ор­наттық. Ақан сері кейін “Құлагерге ескерткіш қойыңдар”, деп кеткен жоқ қой, демек, халық өзінің жүре­гінде жүрген асылын өзі бағалайды. Сол асылдар ең алдымен қазақты құр­меттеп, ұлтына қызмет атқаруы керек. Сонда халқы да оны оң бағалайды. “Халық қаласа, хан түйесін сояды” деген тәмсіл бар. Себебі, ше­шеннің әрбір қиыннан қиыс­тырған сөзі, бидің әділ шешімі, қайысқан жауға тайсалмай қарсы шығып, ұлтарақтай жер үшін шай­қасқан батырды халқы небір атаулармен ұлықтап, мақтан еткен. Сондықтан халқын, елін сонау Кеңес өкіметі ыдыраған алмағайып кезеңнен аман-есен алып шығып, экономиканы нығайтып, бүгінгі әлемдік дағдарысқа да төтеп беріп, әлем қайраткерлерін мойындатқан Н.Назарбаевты халқымыз ешбір заң-зәкүнсіз-ақ “көсемім де”, “ше­шенім де”, “биім де”, “батырым да” деуі әбден ықтимал. Жеңіс МЕЙІРМАН, ардагер ұстаз, Екібастұз қаласының құрметті азаматы. Павлодар облысы, Екібастұз қаласы.