Мәжіліс спикері, «Amanat» төрағасы Ерлан Қошанов ауылды дамыту мәселесі Мемлекет басшысының ерекше бақылауында екенін атап өтті. Осы орайда, партия қоғамда кең қолдау тапқан «Ауыл аманаты» және «Жер аманаты» сынды екі жоба әзірледі. «Ауыл аманаты» – ауылды дамытудың жаңа драйвері. Жалпы алғанда, 2029 жылға қарай жоба аясында 1 млн ауыл тұрғынын қамтып, 350 мың жаңа жұмыс орнын ашу жоспарланып отыр. Алғаш рет ел тарихында аталған мақсатқа 1 триллион теңге көлемінде қомақты қаражат бөлінді.
«Ауыл аманаты» – Президенттің сайлауалды бағдарламасына енгізілген бірегей жоба. Жобада ауыл тұрғындарының тұрмысын жақсартудың нақты әрі түсінікті тетіктері қарастырылған. Ең бастысы, қаражаты толық шешілген. Бір жылдың ішінде жобаның тиімділігін көріп отырмыз. Барлық мемлекеттік орган мен әкімдік «Ауыл аманаты» жобасын сапалы жүзеге асыруға тиіс. Негізгі міндет те осы болуы керек», деді ол.
Премьер-министрдің орынбасары Тамара Дүйсенова «Ауыл аманаты» жобасы аясында жұмыспен қамтылған азаматтар санын арттыруға арналған нақты жоспармен бөлісті. Ал Ауыл шаруашылығы министрі Айдарбек Сапаров фракция мүшелерін жобаның негізгі көрсеткіштері туралы хабардар етті. Отырыс барысында бейнеконференция режімінде бірқатар өңірдің өкілдері сөз алып, жобаны жергілікті жерде жүзеге асыру мәселесіне қатысты пікір білдірді.
Талқылау барысында Мәжіліс спикері өңірлер арасындағы қаржылық теңгерімсіздікке назар аударды. Былтыр жалпы несие сомасының 43,9 млрд теңгесі Жамбыл және Түркістан облыстарына берілді. Алайда небәрі 1 миллиард теңге алған аймақтар да бар. Сондай-ақ Ерлан Қошанов Үкімет ірі ауыл шаруашылығы кооперативтерін құруға тиісті көңіл бөлмейтінін атап өтті. Партия жанындағы жобалық кеңсе былтыр ауыл шаруашылығындағы жекелеген салалардың экономикалық бағдары мен даму әлеуетін анықтау үшін 166 ауданда, 16 шағын қала мен 2 260 ауылдық округте скрининг жүргізгенін еске салды.
«Болашақта барлық кем-кетікті ескеру қажет. Жоспарланған көрсеткіштерге қол жеткізу үшін алдағы кезеңде кемінде жыл сайын 50 мың жұмыс орнын ашып отыруға тиіспіз. Қағаз бетіндегі әдемі цифрлардың қажеті жоқ деп санаймын. Бастысы – жұмыссыз ауыл тұрғындарын тұрақты еңбекпен қамту», деді Ерлан Қошанов.
Жиынды қорытындылаған партия төрағасы жоба аясында несие беруді цифрландыру үдерісін жеделдетуді, мал сатып алу және техникамен қамтамасыз ету мәселелерін пысықтауды, статистика деректерін бірыңғай стандартқа келтіруді, сондай-ақ ауқымды түсіндіру жұмысын жүргізуді тапсырды. «Ауыл аманаты» жобасын жүзеге асыру барысы партия фракциясының ерекше бақылауында болады.
Іс-шара аясында Ауыл шаруашылығы министрлігі әзірлеген «Ауыл аманаты» ақпараттық жүйесі таныстырылды. Платформа «Ауыл аманаты» бағдарламасына онлайн режімде өтініш беруге және ол өтініштің жай-күйін бақылауға мүмкіндік береді. Бүгінде платформа қанатқақты режімде жұмыс істейді. Биыл шілдеде платформа толық іске қосылады. Сондай-ақ фракция мүшелері «Ауыл аманаты» жобасы аясында өндірілген ауыл шаруашылығы өнімдерімен танысты.
