Жоғарыдағы көрсеткіштің нәтижесінде Қазақстанның өрендері жалпы командалық есепте екінші орынды иеленді. Алдымызда Жапония құрамасы. Күншығыс елінің өкілдері 36 алтын, 20 күміс және 15 қоланы еншіледі. Барлығы – 71 жүлде. Ал сары құрлықтың өзге алпауыттары артымыздан сығалап қалды.
Біз бұған дейін отандастарымыздың алғашқы күндердегі нәтижелерімен таныстырған едік. Жарыстың соңғы тәулігінде Әділбек Мусин (50 метр, баттерфляй), Ксения Игнатова (200 метр, шалқалап жүзу), Софья Сподаренко (50 метр, баттерфляй), Егор Попов (200 метр, шалқалап жүзу), София Әбубкірова (50 метр, баттерфляй) және Максим Сказобцова (50 метр, баттерфляй) алтын алса, Диана Тасжанова (200 метр, шалқалап жүзу) күміспен күптелді. Арсен Қожахметов (200 метр, брасс) пен Даниил Черепанов (100 метр, еркін тәсіл) қолаға қол созды. Бір айта кетерлігі, дүбірлі додада отандық жүзушілеріміз Азияның 14 және Қазақстанның 3 рекордын жаңартты.
Жүзушілердің жарысы аяқталған бетте суға секірушілердің сайысы басталды. Одан кейін артистік жүзу мен су добынан бәсекелер өтеді. Азия чемпионаты 9 наурызда өз мәресіне жетеді.
