Қазақстан мен Әзербайжан арасындағы сауда-экономикалық ынтымақтастық жөніндегі бірлескен үкіметаралық комиссияның 20-отырысының қорытындысы бойынша өткен кездесу барысында тараптар елдердің энергетика, мұнай транзиті, жаңартылатын энергия көздерінің ауқымды жобаларын іске асыру саласындағы ынтымақтастығына қатысты бірқатар мәселені талқылады.
Айта кетейік, 2022 жылы Президент Қасым-Жомарт Тоқаев Транскаспий дәлізі бойынша мұнай тасымалдау көлемін арттыруды тапсырған болатын. Соған сәйкес 2022 жылдың қараша айында «ҚазМұнайГаз» ҰК АҚ мен Әзербайжан Республикасының «SOCAR» мемлекеттік мұнай компаниясы арасында «Ақтау – Баку – Тбилиси – Жейхан» бағытында мұнай транзиті туралы келісімге қол қойылды.
2023 жылы Ақтау портынан «Баку – Тбилиси – Жейхан» бағытында жөнелтілген мұнай 1 057 мың тонна болды. Ал биыл қазақстандық мұнайды БТД арқылы тасымалдауды 1,5 млн тоннаға жеткізу жоспарланып отыр.
«ҚазТрансОйл» АҚ баспасөз қызметінің хабарлауынша, 2024 жылдың алғашқы айында Ақтау порты арқылы тасымалданған қазақстандық мұнай экспортының көлемі 287 мың тоннаны құрады. Оның ішінде Ақтау портынан Баку портына қарай мұнай тасымалдау көлемі 60 мың тоннаға артып, 116 мың тоннаны құрады.
Бұған дейін Үкімет Теңіз, Қарашығанақ және Қашаған кен орындарын кеңейту жобалары жүзеге асырылып жатқанын мәлімдеген еді. Кейінгі уақытта мұнай тасымалын әртараптандыру, Еуропаға бағытталған мұнайды Ресейді айналып өтіп тасымалдау мәселесі барынша өзекті болып отыр. Алдағы екі жылда Транскаспий бағытымен мұнай тасымалдау 3 млн тоннаға дейін жеткізіледі. Жоба кезең-кезеңімен жүзеге асырылады.
«Біздің ұлттық компанияларымыздың алдына Қазақстанда өндірістің өсуін ескере отырып, мұнай жеткізу көлемін ұлғайту міндеті қойылды. Осыған байланысты біз қазақстандық мұнайды жеткізу көлемін ұлғайтуды жоспарлап отырмыз», деп атап өтті кездесу барысында А.Сәтқалиев.
Энергетика министрлігінің басшылары Каспий теңізінің түбіне терең су кабелін төсеу арқылы Кавказ өңірі мен Орталық Азияның энергия жүйелерін қосуға бағытталған жобаны іске асыру жөніндегі алда атқарылар жұмыстарды да талқылады.
