Суреттерді түсірген – Ерлан ОМАР, «EQ»
Ұлт мәдениетінің алтын сәулесі оның зергерлік өнерінен айрықша көрінеді. Асқан шеберлікті талап ететін зергерлік бұйымдардан халықтың тарихы мен танымын, дәстүрі мен дәуірін бағамдай аламыз. Сақ бабаның сауыты мен саусағындағы бұйымдар сонау ғасырдан бүгінге аман жетіп, жаңарып, түрленіп, халқымыздың сәніне салтанат қосып келеді. «Таққаным құлағыма күміс сырға, күмбірлетіп шығамын күнде қырға» деген қара өлең шумақтары жоғарыдағы ойымызды қуаттап тұр. Көрмені ұйымдастырушылар зергерлік өнер арқылы еліміздің бай дәстүрі мен тарихын таныстырып, аталған өнерді көпшілікке насихаттауды мақсат еткен.
Салтанатты шараның алғашқы құттықтау сөзін Мәдениет және ақпарат министрлігі Музей қызметі және материалдық емес мәдени мұра басқармасының басшысы Гүлзейнеп Пазылова жеткізді. «Ұлыстың ұлы күні – Наурыздың онкүндігі осындай керемет көрменің ашылуымен басталып отыр. Мұндай көрмелер арқылы қазақтың болмысын танытатын туындылардан өрісіміз кеңейіп, танымымыз толыға түсері анық», деді ол.
Суретші, этнограф Қалиолла Ахметжан көрменің рухани маңыздылығына тоқталып, зергерлік бұйымдардың көркемөнер үлгісі ғана емес, халқымыздың дүниетанымы, наным-сенімі, әдет-ғұрпы мен тарихы көрініс тапқан құндылығы жоғары мұра екенін атап өтті. Сонымен қатар Қ.Ахметжан ұлттық музей тарапынан қолөнер үлгілерін көрсетіп қана қоймай, оларды ғылыми тұрғыда зерттеп-зерделеп жатқаны – мемлекетіміз жарқын болашағына бастама екенін баса айтты.
Музейдегі қорды есепке алу бөлімінің жетекшісі әрі көрменің кураторы Тоғжан Әділбекова болса, қазақ халқының қыз баланы тәрбиелеу және оны сән-салтанатымен өсіру жайында ой сабақтады. Құттықтау сөздерден кейін көрме қонақтары назарына ұлттық әшекей бұйымдарынан дефиле ұсынылды. Дефиле барысында мойын-самай әшекейлері, сырғалар, білезіктер, жүзіктер, бұрым әшекейлері сияқты бұйымдар көрсетілді. Әйел затының жас ерекшеліктері, қоғамдағы мәртебесіне сай сән үлгісі таныстырылды.
И.Тасмағамбетовтің бұл коллекциясы бас-аяғы 1382 бұйымнан тұрады. Бұдан бөлек музей қорында Болат Сарыбаевтың жеке коллекциясы сақталған. Онда үш жүзден аса музыкалық аспап жинақталған.
