Фото: www.sb.by
Сочи фестиваліне наурыздың 1-7 аралығында 190 мемлекеттен барлығы 20 мың адам келген. Қазақ жастарынан бөлек басқосуға Өзбекстаннан 200-ден астам, Тәжікстаннан – 275, Үндістаннан – 360, Конго Демократиялық Республикасынан – 100, Бангладештен – 95, Аргентинадан 100-ге жуық өкіл қатысқан. Әр делегат ашылу салтанатында өз елдерінің туларын көтеріп, алаңды жүріп өткен. Кейін «Роза холл» концерт кешенінде III Ұлттық интернет-контент сыйлығының алғашқы жеңімпаздарын марапаттады.
– Менің ойымша, Интернетті дамыту институты өз жүлдесін осында, Дүниежүзілік жастар фестивалі кеңістігіне ауыстырғаны өте дұрыс сияқты. Өйткені әрбір делегат, әрбір қонақ, әрбір сарапшы дәл осы номинацияға лайықты. Себебі сіздер әлемнің жақсы жаққа бағыт алуына, дамуына себепшісіздер. Біздің өлкеге келу осы жердегі әрқайсыңызға оңай болмады. Біз білмейтін кедергілерді еңсеріп, жанымызда тұрсыздар. Сол үшін сіздерге ерекше ілтипатымды білдіремін, – деді Ресей Федерациясы Президенті әкімшілігі басшысының бірінші орынбасары Сергей Кириенко.
Төрткүл дүниеге көз тіккен ауқымды іс-шараға ресейлік Жастар ісі жөніндегі федералды агенттік және бірнеше ведомство ұйытқы болған. Фестиваль қатысушылары халықаралық жас кәсіпкерлер қауымдастығын құру туралы декларацияға қол қойды. Мұнда жас кәсіпкерлер үшін арнайы іс-шаралар ұйымдастырылып, бизнестің өзекті мәселелері талқыланды.
– Қоғамдастық дүниежүзілік жастар фестивалінің мұрасына айналады. Білім, тәжірибе және ресурстармен алмасу орталығы ретінде арнайы құрылған платформа болашақта қатысушыларға өз бизнесін дамытуға, әр мемлекеттің бизнес ортасын зерттеуге, кәсіпкерлерге жаңа нарықтарға шығуға, байланыстар желісін кеңейтуге және кәсіпкерлік қызметте жаңа биіктерге жетуге көмектеседі, – деді РФ Жастар ісі жөніндегі федералды агенттік басшысының кеңесшісі Олег Макаров.
Сочидегі бүкіләлемдік жастар фестивалінің қатысушысы, отандасымыз Перизат Жаңбырбаева жастар форумның атмосферасымен бөлісті.
«Мұндай орталарда әлемнің әр бұрышынан келген жастар қарым-қатынас жасайды, танысады, жаңа әсерге бөленеді. Олардың өмір сүру деңгейімен танысып, ой-өрісін кеңейтеді. Бұл менің Ресейге алғашқы сапарым. Игі іс-шара мен күткендегіден де өте жоғары деңгейде ұйымдастырылған», деді белсенді.
Бағдарлама аясында Мәдениет және ақпарат вице-министрі Евгений Кочетов Қырғызстан, Қытай, Өзбекстан, Татарстан делегацияларының басшыларымен бірқатар екіжақты кездесу өткізді. Қырғызстанның Мәдениет, ақпарат, спорт және жастар саясаты министрінің орынбасары Марат Тағаевпен кездесу барысында тараптар екінші қазақ-қырғыз жастар форумын өткізу мәселелерін талқылады.
Сондай-ақ Евгений Кочетов Бүкілқытай жастар федерациясы төрағасының орынбасары Лю Каймен өмірдегі түрлі сала бойынша жастарға тең мүмкіндіктер жасау, жастар кәсіпкерлігін қолдау мен дамыту және жастардың қоғамдық-саяси өмірге белсене қатысуы жайында сөйлесті. Кездесулер қорытындысы бойынша жастар саясаты саласындағы ынтымақтастықты нығайту туралы келісімге келіп, биылға арналған екіжақты іс-шаралар жоспары белгіленді.
Жабылу салтанатына Ресей Федерациясының Президенті Владимир Путин арнайы қатысты. Ол дүниежүзілік жастар фестивалінің қатысушыларымен пікір алмасып, сөз сөйледі.
