Жасы 40-қа таяп қалса да, әлі де жастарды «жапырып» жүрген Александр Шлеменконың есімін естімеген жанкүйер жоқ-ау, сірә! Омбының тумасы спортттық мансабын 2004 жылы бастады. 20 жыл уақыт аралығында 78 рет айқас алаңына шығып, 62 мәрте мерейі үстем болды. 32 кездесуде қарсыласын есінен тандырды. 15 рет ұтылып, бір бәсекеде тең есеп тіркелді. Ресейдің жекпе-жек шеберлері арасында «Штормның» есімі даңқы жер жарған Федор «Соңғы император» Емельяненкомен қатар аталады.
Александр әр жылдары Венер «Башқұрт» Галиев, Роберт «Бубба» Макдэниел, Брайан Роджерс, Витор Вианна, Майкел «Big Rig» Фалкан, Ясуби Энамото, Мелвин «Аяусыз» Манхуфф, Алекс «Ковбой» Оливейра және тағы басқа саңлақтарды сабады. Сондай-ақ Роналдо «Жакара» Соуза, Эктор Ломбард, Тито «Жаман жігіт» Ортис, Гегард «Ассаин» Мусаси және Магомед «Жыртқыш таз» Исмаиловқа есе жіберді. Әрине, ондай атақтары алысқа жайылған жампоздардан ұтылу Шлеменконың беделіне еш нұқсан келтірмегені анық.
Орта салмақтағы Омбының оғланы 2010 және 2011 жылдары Bellator промоушенінің Гран-при турнирінде екі рет топ жарды. 2013-2014 жылдар аралығында сол ұйымның чемпиондық атағын иеленді. Александр Шлеменко басқа да белді промоушендерде күш сынасып, талай рет алтын белбеуді беліне тақты.
Ал қазақтың ерке ұлы Қуат – ешкімнен қаймықпайтын нағыз жаужүректің өзі. Данияр Қасқарауов жетекшілік ететін «Алаш Прайд» клубында қанаттанған «Найманның» әмбебаптығы соншалық, ол октагонда төбелесіп қана қоймай, кино мен жарнамаға түседі, «разборкаларға» барады, ән салады, ара-тұра саясатқа да араласады. Қуаттың басқа да көпшілік біле бермейтін жақсы қырлары көп. Қашанда халықтың жоғын жоқтап, шындық үшін шырылдап жүретін қазақтың өр мінезді өрені бұл айқасқа «бес қаруын асынып» аттанатыны анық. Себебі Александр Шлеменконы ұту оңай болмайды. Челябідегі жекпе-жекте біз Хамитовқа сәттілік тілейміз.
