Маңғыстаулықтар «Көрісу күні» деп айрықша күтіп, таң атысымен қол алысып, құшақ айқастыра көрісетін мереке жылдағы қалыпқа сай биыл да Маңғыстаудағы ең биік нүкте – Отпан тауда аталып өтті. Таудың шыңында 37 метрлік Адай ата және оның екі ұлы Құдайке мен Келімбердінің құрметіне қойылған екі мұнара стеласы бар. 2007 жылы ашылған «Отпан тау» тарихи-мәдени кешенінде әр жыл сайын Көрісу күні мерекелік іс-шара ұйымдастырылып, «Бірлік оты» жағылды.
Биыл Көрісу күні «Амал – Алашқа ортақ мереке» атауымен кең көлемде тойланды. Маңғыстаулықтар Мемлекет басшысы Қ.Тоқаевтың «Әз-Наурыздың бастауы – Амал күні құтты болсын! Бұл – халқымыздың ежелгі әдет-ғұрпын жаңғыртып, төл мәдениетіміздің ажырамас бөлігіне айналған бірегей дәстүріміз. Осы күні ұлттық болмысымыз бен құндылықтарымыз ерекше дәріптеледі. Ел ырысы көбейе берсін! Жыл жақсылығымен келсін!» деген құттықтауын қуана қабылдады.
Мерекеде Өзбекстан Республикасының еңбек сіңірген мәдениет саласының қызметкері, жыршы, өнер саласының магистрі Махаммад Эшбоев, Түркия Республикасының Бішкектегі «Қырғыз, Түрік, Манас» университетінің оқытушысы, профессор Ирфан Гөрдал бастаған қонақтар өз өнерлерін ортаға салып, ағайынға ақ тілегін арнады. Тек Отпан тауда емес, Көрісу күнінің ізгі іс-шаралары Ақтау қаласында, аудандарда жалғасын тауып жатты. Шың басындағы той 13 наурыз күні «Бірлік отын» жағу рәсімімен басталды.
– Маңғыстаудың ең биік шыңында от жағу дәстүрі тарихтың тереңінен бастау алады. От жағу бірлікті білдіреді және ұйымшылдықтың белгісі. Руларға, жүздерге, ұлттарға бөлінбестен, біз бәріміз ортақ Отанымызға адал қызмет етеміз. Ғасырлар бойы бұл күн терең рухани мағынаға ие болды. Біздің ата-бабаларымыз өткен қыста отбасы мен қыстан аман шыққанына қуанды, бүгін біз бір-бірімізді көктемнің басталуымен құттықтаймыз, реніштерімізді кешіреміз және күнделікті қарбаласта жақындарымызға уақыт табамыз деген ниетпен. Ұрпақтар сабақтастығы орнайды, бірақ «Көрісу күні» көктемнің жақындап келе жатқанын және жаңа үміттер мен мүмкіндіктердің пайда болуын еске салып қала береді. Бұл мереке баршаңыздың жүрегіңізді жылулық пен қуанышқа толтырсын! Сіздерге бақыт, жақсылық және амандық тілеймін!
– Бүгін Ақтау қаласындағы «Достық үйінде» халқымыздың жасампаздығы мен ілгері жылжуына кедергі келтіретін жағдайларды қалай жоямыз деген ой-талқыға құрылған республикалық деңгейдегі ауқымды конференция өтті. Соның жалғасы ретінде «Бірлік оты» жағылды. Бәріміздің бірлікте болуымыз маңызды екені белгілі. Мемлекет басшысы Жолдауларында елдің дамуы үшін бірлік, тұрақтылық керек екенін айтудан жалыққан емес. Ол үшін ынтымағымызды жоғалтпауымыз қажет. Амал – баршамызды біріктіретін мереке болсын. Мереке құтты болсын, керегеміз кең, шаңырағымыз биік болсын, – деді аймақ басшысы Н.Ноғаев.
Н.Ноғаев айтқандай, Амал тойы аясында Мәдениет және ақпарат министрлігінің этносаралық қатынастарды дамыту комитетінің төрағасы Ғалым Шойкин, жеңіл атлетикадан КСРО-ның еңбек сіңірген спорт шебері Әмин Тұяқов, жазушы Камал Әлпейісова мен Мажарстандағы «Абай» мәдени орталығының төрағасы, танымал түркітанушы ғалым Иштван Қоңыр Мандокидің зайыбы Оңайша Мандоки сынды руханият өкілдері, Астана, Алматы, Шымкент қалалары мен басқа облыстан келген өңірлік ақсақалдар кеңесінің мүшелері жиылып, халқымызды отбасы құндылықтарын дәріптеуге, еліміздегі бірлікті сақтауға шақырған үндеу жолдады.
Амал таңы алдындағы кеште Отпан сахнасында Қазақстанның халық әртісі Роза Рымбаева өңір тұрғындары мен қонақтарын мерекемен құттықтап, әннен шашу шашты. Шетелдік қонақ жыршылардың, жергілікті өнерпаздардың қатысуымен жыршылар байқауы өткізіліп, жазба ақындар өзара бәсекеге түсті.
Той «Сәлем – сөздің атасы» атты театрландырылған қойылым, аудандық және қалалық шығармашылық ұжымдардың концерттік бағдарламасы, ат, құмай тазылар жарысы, өзге де спорттық іс-шаралармен жалғасты.
Биылғы іс-шараны ұйымдастырған Мұңал ата ұрпақтары келесі жылы Амалды тойлауды ұйымдастыру эстафетасын Қосай ата ұрпақтарына табыстады.
Маңғыстау облысы
