Сурет: Елорда әкімдігінің ресми сайты
Қазір еліміздің түкпір-түкпірінде Наурызнаманың онкүндігі өтіп жатыр. Қайырымдылық, жанашырлыққа үндейтін «Мейірімділік күні» астаналық жастарымыз да көппен бірге болды.
– Біз жыл бойына осындай форматтағы акцияларды жиі өткіземіз. Қарттарға, әлеуметтік осылар топтарына жәрдем беріп, үнемі назардан тыс қалдырмаймыз. Бас қаланың тыныс-тіршілігіне жауапты көше қызметкерлеріне қыста ыстық шай мен тәттілерді үлестіруге жиі шығамыз. Осылайша, біз адамдарды мейірімділікке, жанашырлыққа және жақсы қарым-қатынасқа үндегіміз келеді, – деді волонтер Аружан Дәулетиярова.
Өз кезегінде, «Астана жастары» еріктілер қозғалысын дамыту бөлімінің басшысы Эльвира Есмұханова мұндай акцияларды өткізудің және қайырымдылық күнін атап өтудің маңыздылығына тоқталды.
– Бүгінде «Астана жастары» жастар ресурстық орталығының қатарында 5 мыңнан астам волонтер бар. Еріктілермен бірге тіпті аз мүмкіндікпен де бір-бірімізге көмектесуге болатынын көрсеткіміз келді. Жастар коммуналдық қызметкерлерге арнап акция өткізу бастамасын көтерді. Олар ауа райының қолайсыздығына қарамастан қалада тәртіп пен тазалықты сақтайды. Сондықтан жанашырлар ыстық шай мен бауырсақтарды таратумен қатар, қар күреуге көмек көрсетеді, халықтың әлеуметтік осал топтарынан шыққан отбасыларға азық-түлік себеттерін де тасымалдайды, – деді Э.Есмұханова.
Қайырымды жандардың игі ісіне тәнті болған тазалықшылар да жастарға алғысын айтып, үлкендері ақ батасын берді. Белсенділер «Игі істер марафоны» аясында да елорда әкімдігі және «Qazaq oil» компаниясымен бірлесе тұрғындарға 1000-нан аса азық-түлік себетін таратты.
– 2023 жылдың наурыз-желтоқсан айлары аралығында Астанада мұқтаж азаматтарға 4 мыңнан астам азық-түлік жиынтығы таратылды. Бұл жолы азық-түлік жиынтығы аз қамтылған отбасылар, көпбалалы аналар, ерекше қажеттіліктері бар балаларды тәрбиелеп отырған отбасылар, зейнеткерлер және толық емес отбасылар сияқты халықтың әлеуметтік осал топтарына таратылады. Қораптың салмағы 45 кило және барлық жүктің салмағы 45 тоннадан асады. Азық-түлік қоржынында ұн, қант, қарақұмық, күріш, макарон, балаларға арналған тәттілер сияқты қажетті тауарлар бар, – деді Астана әкімінің кеңесшісі Қуаныш Молдабек.
Азық-түлік себеттерінің бірін алған көпбалалы ана Роза Сырбекова акция ұйымдастырушыларына көрсеткен көмегі үшін алғысын білдірді.
– Қолдау көрсеткеніңіз үшін және мерекелік көңіл-күй сыйлағаныңыз үшін рахмет. Отандастарымды Ұлыстың ұлы күні Наурыз мерекесімен құттықтаймын. Баршаңызға денсаулық пен ашық аспан тілеймін, – деді елорда тұрғыны.
«Игі істер марафоны» қайырымдылық акциясы жыл соңына дейін жалғасады. Жалпы, Астанада азық-түлік себеттері жыл сайын таратылады.
