Фото: Inform.kz
Қолға алынған өзгерістердің нәтижесінде халық билікке әлдеқайда жақындай түсті. Құрылтай дала демократиясында формат деңгейінде тарих жадында сақталып қалған. Мемлекеттіліктің тағдыры сын тезінде қалған кезде ата-бабамыз ортадан халық өкілдерін сайлап, келелі мәселелерді осындай құрылтайларда шешті. Аузы дуалы, сөзі уәлі азаматтардың ой-пікірін, жоба-ұсынысын талқылап, ортақ және оңтайлы пәтуа жасасты. Бүгін бабадан қалған дәстүр жалғасып жатыр. Мемлекет басшысы айтып өткендей, Құрылтайды ерекшелендіретін сипат – оның кең ауқымдылығында, жұмыстың сапасы мен тиімділігіне тікелей әсері бар азаматтардың басқосуы, халықтың үнін, мұң-мұқтажын, талап-тілегін шынайы жеткізе алуында. Бүгінде отандастарымыз Үкіметтің, жалпы мемлекеттің жоспарларын жүзеге асыруға атсалысып келеді. Жүргізіліп жатқан реформалар олардың сұранысын ескере отырып жүргізілуде. Мысалы, Парламент пен жергілікті ауыл әкімдерінің сайлауы өтті. Ендігі кезекте – аудан, қала әкімдерін сайлау. Мұның бәрі мемлекеттің ашықтығын және елді басқаруға өз үлесін қосу мүмкіндігін көрсететін елеулі өзгерістердің белгісі.
Мемлекет басшысы алғашқы Құрылтайда қазақ азаматы өз ойын айта алатындай платформа қалыптастыру керектігін айтқан болатын. Нәтижесінде, бүгінде жүзден астам Құрылтай мүшесі халық пен билік арасындағы өзіндік көпірге айналды. Қазақ жеріндегі тарихи жәдігерлердің біразы ұлттық құндылық ретінде ЮНЕСКО тізіміне енді. Бұл тек Қазақстанда емес, бүкіл Орталық Азияда ғылымның дамуына серпін берді. Тарихи мұрамызды сақтау жұмыстары жалғасып келеді.
Шаймардан НҰРЫМОВ,
Ұлттық құрылтай мүшесі
АЛМАТЫ
