Мерекелік іс-шараға келушілерге шектеу жоқ. Қала қонақтары мен тұрғындары көңілді мерекенің қақ ортасында болып, ұлттық дәстүрлеріміз ұлықталған марафонды тікелей эфирде де тамашалай алды. Қонақтардың құрметіне әннен шашу шашылып, ұлттық ойындар ойнатылды. Сондай-ақ Ұлттық спорт күнімен тұспа-тұс келген іс-шарада қыранды қолға үйретіп, тазы баптаған аңшы-саятшылар да атадан мирас болып келе жатқан ұлттық өнеріміз туралы білгенімен бөлісті.
Іс-шараға Сенат және Мәжіліс депутаттары, мемлекет және қоғам қайраткерлері, зиялы қауым, өнер, мәдениет, ұлттық спорт өкілдері және ерекше ісі мен ерлігімен көзге түсіп жүрген отандастарымыз қатысты. Арнайы құрылған Этноаумақ, түрлі тақырыптағы талқылаулар өткізілетін дискуссия алаңы, сұхбат және ұлттық ойындар алаңы ұйымдастырылды. Мәселен, дискуссия алаңында түрлі сала өкілдері, отандық этнограф ғалымдар «Наурызнама», «Ұлттық сезім», «Жаңа заманның адамы» тақырыптарында ой-пікірімен бөлісіп, талқылауға қатысты.
Сонымен бірге марафонға ерлік ісімен елдің есінде қалған адамдар келді. Мәселен, Алматы облысының Іле ауданында автобус апаты кезінде жолаушыларды аман алып қалған 8-сынып оқушысы Ақжол Герой, боранда жолда қалған жүкті әйелге жәрдем берген Ерейментау аудандық Төтенше жағдайларды жою бөлімінің қызметкері Амангелді Доскенов, мұз ойылып, суға түсіп кеткен 17 жастағы елорда тұрғынын құтқарып қалған Мереке Едресов, 1 500-ге жуық музыкалық аспапты жинап, сақтап жүрген қолөнер шебері, музыкатанушы Азамат Бақия, бүркітші, «Qazaqstan» телеарнасынан шығатын жаңа «Бүркітші қыз» телехикаясының кейіпкері Айшолпан Нұрғайып, алып күш иесі, Гиннес кітабының рекордшысы Сергей Цырульников пен Алматыдағы жер сілкінісі кезінде операция жасауын тоқтатпаған Кардиология және ішкі аурулар ғылыми зерттеу институтының хирургі Ахыт Бағдат тікелей эфирге шықты. Марафон қатысушылары бұдан бөлек, Қызылорда облысындағы оннан астам этнос өкілі тұратын Интернационал-3 ауылындағы Наурыз тойына куә болды.
Ұрпақ сабақтастығын жаңғыртып, ұлттық өнерді ұлықтауға арналған марафонның маңызы – ұлттық ойындар сайысы, айтыс, күй тартысы мен ұлттық киімдердің сән үлгісін көрсеткен концерттік бағдарлама арқылы қазақ халқына тән ұлттық ерекшеліктерді паш етіп, болмысымызды танытуға септігін тигізу.
