Әрине, оны кәсіпке айналдырып, тамақ асыраймын деп ойлаған жоқ-ты, алайда бұйымдарына қызығушылық танытып, сатып алушылар пайда бола бастағанда, бұл істі табысты бизнеске айналдыруға болатынына көзі жетті.
Қазір Кенжебек арнайы станок сатып алып, тұтас өндіріс кешенін құрып отыр. Сөйтіп, 2020 жылы «Creativ kz» кәсіпорнын тіркетеді. Алдымен өз үйінде тапсырыс қабылдап, әсемделген қайың тақтайдан оюмен жасалған аяқ-табақтар, асүйдің жарақтары, ескерткіш тақталар жасап жүрді. Одан әрі ұсынысқа байланысты төр шежіресін әсемдеп жасап беретін болды. Осы бұйым жерлестердің қызығушылығын тіпті арттыра түсті. Тапсырыс беруші клиенттер кезекке алдын ала жазылатын болды.
Бизнесін дамытуды ойлаған Кенжебек «Бизнес бастау» бағдарламасы бойынша ұсынылған 48 жобаның бірі болып конкурсқа қатысып, 500 мың теңгенің қайтарымсыз грантын жеңіп алған. 2021 жылы цех ашып, ісін одан әрі дөңгелетті. Шикізаттық материалдарды Кенжебек негізінен Астана мен Алматыдан алатын көрінеді.
«Ағаштан істелген бұйымдардың көптеген артықшылығы бар. Алдымен олар экологиялық тұрғыдан таза. Құрамында ешқандай зиянды токсиндер жоқ. Үй-ішіндегі бала-шаға да, үлкендер де еш қауіптенбей ұстай береді. Екіншіден, шикізат көзі жақын болғандықтан жасаған бұйымдарымның бағасы жоғары емес, ол барлық тұрғынға қолжетімді. Үшіншіден, мен тапсырыс берушінің барлық қалауын ағаштан жасай беремін. Кейбіреулер той үшін арнайы тапсырыс береді. Жалпы, бағалы ағаштан жасалған заттар кез келген интерьерге сән береді», дейді Кенжебек Таңатов.
2022 жылы Кенжебек «Кәсіпкерлікті дамытудың 2021-2025 жылдарда арналған ұлттық жобасы» Мемлекеттік бағдарламасы бойынша «Банк ЦентрКредит» АҚ арқылы 5 млн теңге несие алды. Оның жылдық өсімі 23 пайыз болғанымен «Даму» қорының субсидиялауымен өсімнің 6 пайызын ғана төлейді. Сонымен қатар несие бойынша ешқандай кепілдік зат талап етілмейді. Осы несиенің арқасында қазір Кенжебек ағаш сүргілейтін, оюлайтын лазерлік бағдарламалық станок, 3D принтер сатып алып, IT технологиялары арқылы тақтайға сурет салуды жасайтын болған. Қазір біздің облыс қана емес, оған тапсырыс берушілер көршілес өңірлерден де келетін болды.
Той сәнін келтіріп, тақтайға оюлап жазылған әдемі тілектер, фотоларға арналған өрнекті жақтаулар, тойбастар табақтары, астаулар, декоративтік қораптар көздің жауын алады.
Ағаштан түйін түйген шебердің цехында қазір 5 адам нәпақасын айырып отыр.
Солтүстік Қазақстан облысы
