«Мәдениет және ұлттық салт-дәстүр» күні сан түрлі салтымызды, тәрбиелік мәні терең дәстүрлерімізді көрсетсек, «Шаңырақ» күні елу-алпыс жыл отасқан үлгілі отбасылар арасында сайыс өтті. «Ұлттық киім» күні оюлы камзол-бешпеттерін киді. Көпшілік иықтарына жараса кеткен ұлттық нақыштағы шапандарын күнделікті киіп жүруді әдет қылды. Он күндіктің аясында ұлттық спорт та кеңінен насихатталды. «Ынтымақ» күні бір шаңырақ астындағы көп ұлттың береке-бірлігін айшықтайтын шаралар өтті. Айналып келгенде, бұл күндері қазақтың рухани байлығын көрсетуге бағытталған іс-шараға толы болды.
Әсіресе өндірісі өркендеп тұрған Риддер қаласында биылғы Наурыз ерекше қарқынмен тойланды. Ұлыстың Ұлы күні қарсаңында Риддердің орталық алаңында он шақты ақ шаңқан киіз үй тігілді. Сәні мен мәні, нақышы айшықталған әр киіз үй тақырыптық бағытта құрылды. Елдік пен бірлікті айқындаған Наурыз мерекесінің басы Риддер қаласының барлық ірі көшелері мен даңғылдарын қамтыған 30 салт атты сарбаз Мемлекеттік Туды желбіретіп ерекше сән берді. Ұлыс күнінің басты кейіпкері – Қыдыр ата қасиетті қыран құсы және ұмай тазысымен ел алдына шықты. Шұғылалы көктемнің шырайы Наурыз-ару сән салтанатымен барша жұртты тамсандырды. Сондай-ақ құралайды көзге атқан садақшылар да мергендіктерін көрсетті.
Жалпы, Наурызнама 10 күндігінде Риддер қаласында 300-ден астам мерекелік іс-шара өткен.
Наурыз күні сахна төрінде жергілікті және облыс өнерпаздарымен қатар, арнайы қонақтар Диана Шарапова, Олег Никитин және Ұланғасыр Қами бастаған әншілер қаланы әнге бөледі. Тойшыл қауым ән тыңдай жүріп, қолөнер шеберлерінің көрмелерін тамашалады.
Жыл басын қарсы алысқан риддерліктер ертесінде «Тазалық күні» деп, қаладан 10 шақырым жерге барып, ұлттық табиғи қорық аумағындағы қалың қар астында қалған бұлақтың көзін ашты. Табиғат пен адамзаттың өзара үндестігін айшықтаған бұл шара жас ұрпақты тазалыққа, қоршаған ортаны қорғауға үйретеді.
Бейбітшіліктің бесігі болған игі бастамаға қаладағы 12 этномәдени орталықтың өкілдері, жастар және қариялар да белсене қатысты. «Жолаушы болсаң, осы ақ бұлақтай таза бол!» ұранымен өткен іс-шара мұнымен шектеліп қалмайды. Қала басшылығының жоспарына сәйкес, қардың көбесі сөгіліп, жер кепкен соң сол бұлақтың маңы тазаланып, абаттандыру жұмыстары жүргізіледі. Кейін бұл жер жолаушылап келе жатқан адамдар тоқтап су ішіп, тамаша табиғат аясында демалатын орынға айналады. Қала басшылығының жоспары сол.
Айта кетейік, дәл осындай игі шаралар облыстың өзге өңірлерінде де ұйымдастырылды. Өскеменнің өзіндегі Наурыз мерекесі де өте жоғары деңгейде өтті. Есіктері айқара ашылған әр киіз үйден халыққа ұлттық тағамдар ұсынылып, наурызкөже сапырылып жатты. Арқа-жарқа жұрт «жыл жайлы болсын» деп, бір-біріне ақ тілектерін жаудырды.
Шығыс Қазақстан облысы
