Өндіріс • 01 Сәуір, 2024

Бәсі жоғары бастама

95 рет
көрсетілді
6 мин
оқу үшін

Щучинск қаласындағы өнеркәсіптік сүзгілерді шы­ға­ратын «Азияфильтр» кәсіпорнының өнімдері сұра­ныс­қа ие. Себебі елімізде дәл мұндай кәсіпорын әзірге жоқ.

Бәсі жоғары бастама

Құрылғанына биыл бес жыл болған кәсіпорын осы уақыттың ішінде өз бағытының қыр-сырын егжей-тегжей зерттеп, толайым меңгеріп, нарық айдынында аты шыға баста­ған. Мамандардың пікірінше, серіктестік өнімдері әлемдегі озық үлгілерден еш кем емес. Осы арада өнім түрлері туралы сәл ғана таратып айта кетелік. Мұндағы сүзгілер төрт бағытта шығарылады. Ауруханадан бас­тап ірі өндіріс ошақтары да серіктестіктің өнімдеріне зәру. Ауадағы шаң-тозаң­ды тазартып, желдететін сүзгі­лер осы бағытта ұзақ жылдан бері жұмыс істейтін Бела­русь, Қытай, Ресей компа­ния­ларымен әділ бәсекеге түсіп, шашасына шаң жұқтырмай келеді.

Серіктестіктің құрылтайшысы – Бурабай баурайындағы Мәде­ниет ауылының тумасы Индира Нұрлан. Құрылтайшының айтуы­на қарағанда, өндіріс ошағын орналастыру туралы еліміздің бірқатар өңірінен ұсыныс түскен екен. Әйтсе де туған жерінің топырағында ту тігуді қалаған. Се­бебі елге шарапатын тигізуді жөн көрген.

Жаңа өндіріс ошағы ашыл­ған­нан кейін жаңа жұмыс орындары пайда болады, аудан бюд­жетіне қыруар салық төленеді. Айтпақшы, қазір кәсіпорын аудан­дағы қомақты салық төлейтін өндіріс ошақтарының алдыңғы қатарында.

Жағымды жаңалық туралы ой ұшқыны осыдан бес жыл бұрын лаулаған. Болашақ саясаттанушы, Л.Н.Гумилев атындағы Еуразия ұлттық университетінің түлегі Польшада магистратурада оқып жүріп осындай компанияда менеджер болып жұмыс істейді. Шаруаға мығым шетелдегі істің қыр-сырын меңгеруге тырысқан. Өндірістік сүзгілер қалай өндірі­ле­ді, өз елінде қажет бола ма, ең бастысы, дәл осындай жұмысты қолға алса, отандық өндірістің кеңінен қанат жайып, өрістеуіне ықпал етуі мүмкін бе? Қыруар жайды зерек көңіліне түйген, ақыл таразысына салып безбендеген. Елге оралған соң өз көңілін баураған поляк компаниясының басшылығымен хабарласып, Қазақстанда өкілдік ашу туралы ұсынысын жеткізген. Қалай болған күнде де нар тәуе­келді қажет ететін іс еді.

во

Түпкі нәтиженің түбегейлі жеміс бере­тініне көзі жетіп тұр. Тыңға түрен салудың оңай емес­тігін де түсінеді. Алдымен еуропалық өнімдерді ел шеңберінде насихаттауды қолға алды. Сұраныс сұрапыл екен. Өнімнің қаншалықты қажет екендігін түсінген соң, 2019 жылы сүзгі өндіретін кәсіпорын ашуға бел буды. Осы арада екпін түсіріп айта кететін бір жай, баламасы жоқ бағалы бастама мемлекеттен ешқандай көмек сұрамаған. Бар шаруаны өз қаражатымен ұйымдастырып, жолға қойған.

Кәсіпорынның техникалық директоры Медіғат Ыбыраевтың айтуына қарағанда, серіктестік өнімдері сүзгінің ондаған түрін шығарады. Олар – желдету жүйелері, өндірістік кәсіпорын­дарға арналған ауқымды сүз­гілер. Тамақ өнеркәсібінде қол­данылатын сұйықтықты да сүзу­ге қажет. Шығарылған бар­лық өнімнің сапасына кепілдік бері­леді. Компания шетелден тек арнайы техникалық матаны ғана сатып алады, басқа қажетті компоненттің бәрі – отандық өндірістің өнімі.

Бізбен тілдескен кезінде техни­калық директор серіктестік өнім­дері туралы таратып айтып берді. Тапсырыс берушілер қатарында «Қазақмырыш» серіктестігі, «Қаз­атомөнеркәсіп» ұлттық атом компаниясы» акционерлік қоғамы тәрізді ірі отандық кәсіпорындар да бар екен. Жаңа кәсіпорын құ­рылғанша тұтынушылар шетел­дің өніміне тәуелді болған. Енді міне, жаңа мүмкіндік ашылып отыр.

Ел ішінде өз жұмысын бас­таған, соныға соқпақ салған жаңа компанияның өнімдерін пайдаланушылар сапасы туралы әділ бағасын бере алады. Бұл арада баға да маңызды рөлге ие. Отандық өндірістің сүзгілері импорттық өнімдерден бірнеше есе арзан. Пайдаланушылар әр­түрлі параметрді қажет етсе, қа­­­ла­ған көлемде жасап беруге әбден болады. Ал дайын өнімді жеткізу, оған кететін уақыт шы­ғыны тіпті ұтымды. Таратып айтар болсақ, алыс-жақын шетелден дәл осы кәсіпорын шы­ға­ратын тәрізді өнімге тапсырыс берсеңіз, кемінде екі ай күту керек. Ал Бурабай баурайындағы серіктестік үш-төрт аптаның ішінде жеткізе алады. Қазіргі күні Қырғызстан, Өзбекстан тәрізді көрші мемлекеттер серіктестік өнімін ат-түйедей қалап алып жатыр.

Енді елге тигізер пайдасы тура­лы айта кетелік. Шағын кәсіп­орында отыздан аса адам жұ­мыс істейді. Барлығы жергілікті тұрғындар. Орташа жалақы 180 мың теңге шамасында. Демек, серіктестік әзірге осынша отбасын асырап отыр деп айтуға болады. Алдағы уақытта Өзбекстанда өз өкілдіктерін ашпақ.

Өндіріс өрге басу үшін әлем тынысын, осы тараптағы бар жаңалықты жіті бақылап, таразыбасына тартып, бейнебір тамыршыдай тап басып отыру қажет екен. Ол үшін серіктестік қызметкерлері алыс-жақын шетелдерге жиі шығып, тәжірибе алмасып тұрады. Техникалық директордың өзі таяуда ғана осындай сапардан оралыпты. Испания, Италия, кейін Францияға барған. Технологиялық жаңалықтарды зерттеген. Өз кәсіпорындарында соңғы жаңалықтардың қайсысын енгізгені ұтымды болады? Міне, мәселенің мәнісі осы.

Алдағы уақытта жұмыс про­це­­сі толық авто­мат­тан­ды­рыл­мақ. Цифр­ландыру міндеті де кезек күтіп тұр. Жаңа жабдық орнатылып, қол күшін қажет ететін жұмыс біршама азайғанымен, жұмысшыларды қысқарту қаупі жоқ. Себеп, әзірге төрт ба­ғыт­та ғана сүзгі дайындаса, бұл өнім­­­нің елуден астам түрі бар екен. Із­де­нім­паз жастар осы бағыт­тағы шаруа­ларын ширата түс­пек.

 

Ақмола облысы,

Бурабай ауданы