Суретті түсірген – Ерлан ОМАР, «EQ»
Еліміздің қай қиырында болсын, дәрігер тапшылығы сезілетіні жылдар бойы айтылып жүр. Дәрігерге қолы жетпей, әбігерге түскендердің де мұңы аз емес. Кадр тапшылығы мәселесі Жамбыл облысын да айналып өткен емес. Алдыңғы жылдары дәрігер тапшылығы жүзден асып кетсе, кейінгі уақытта едәуір азайған көрінеді. Әйтсе де дерекке жүгінсек, өңірде 80 дәрігер жетіспейді екен. Енді осы бір өткір мәселені шешудің маңызы зор екеніне ешкімнің таласы жоқ шығар.
Біршама уақыт бұрын өткен баспасөз мәслихатында Денсаулық сақтау басқармасының басшысы Жанар Оспанова дәрігер тапшылығы әлі де сезілетінін, бұл мәселені реттеу бойынша нақты жұмыстар атқарылып жатқанын тілге тиек етті.
– Бүгінде облыста дәрігерлер тапшылығы 2022 жылғы 106-дан есепті кезеңмен салыстырғанда 80 бірлікке (32 қала, 48 ауыл) төмендеді. Жергілікті атқарушы органның грантымен С.Асфендияров атындағы Қазақ ұлттық медицина университетінде жоғары білімі бар кадрларды даярлау үшін жалпы медицина мамандығы бойынша 42 студент оқитынын айта кеткен жөн болар. Осы университетте жергілікті бюджет есебінен оқу бітіргеннен кейін Жамбыл облысының мемлекеттік медициналық ұйымдарында 5 жыл жұмыс істеу міндеттемесімен 2022 жылы 16 дәрігер жұмысқа келді. 2023 жылы 19 дәрігер жұмысқа орналасты, – дейді басқарма басшысы.
Кейінгі дерекке жүгінсек, кадр тапшылығын жою бойынша бірқатар жұмыс атқарылған екен. 13 жас маман тұрғын үймен қамтамасыз етілсе, 149 дәрігерге 800 мың теңге сомасында көтерме жәрдемақы беріліпті. Сондай-ақ бірнеше дәрігерге 1 500 айлық есептік көрсеткішке дейін бюджеттік несие берілсе, 38 маманға 100 айлық есептік көрсеткіш көлемінде жәрдемақы беріліпті. Бұған қоса 91 маман резидентурада оқиды екен. Бір қарағанда қолдау көрсетіліп-ақ жатыр.
Айта берсек, кадр тапшылығын жою мақсатында қолға алынған жұмыс аз емес. Әйтсе де, дәрігерлердің аздығы әлі де байқалып тұр. 2022 жылғы көрсеткішпен салыстырсақ, дәрігер тапшылығы 26 адамға азайыпты. Бір жыл ішінде кадр дефициті 26 адамға азайғаны көңіл көншіте ме? Дәл осылай кете берсек, қалған 80 маманды табуға тағы бірнеше жыл қажет болмай ма? Осы сауал ойландырмай қоймайды.
Денсаулық сақтау басқармасы баспасөз қызметінің жетекшісі Толқын Өмірбаеваның айтуынша, дәрігер тапшылығын жою бойынша биыл да нақты жұмыстар қолға алынып жатыр.
– Осы жылы республикалық бюджеттен 80 орынға, жергілікті бюджеттен 77 орынға грантқа өтінім берілді. Тиісті бюджет есебінен резидентураны бітірген 30 дәрігер – 2024 жылы, 16 дәрігер – 2025 жылы, 10 дәрігер 2026 жылы жұмысқа келеді деген жоспар бар, – дейді ол.
Дерекке сенсек, өңір медицинасы жалпы практикалық дәрігер, анестезиолог-реанимотолог, акушер-гинеколог, офтальмотолог секілді мамандарға әлі де болса, зәру көрінеді.
Қалай десек те, кадр тапшылығы мәселесі медицина саласында әлі де өзектілігін жоймай тұр. Басы ауырып, балтыры сыздаса, дәрігерге жүгінетін жергілікті халық та ара-тұра маман тапшылығының кері әсерін сезінетіні рас. Қысқасы, бұл проблема аз күнде толыққанды шешімін таба қоюы екіталай секілді. Ең бастысы, атқарылып жатқан жұмыс нәтижелі болса дейміз.
Жамбыл облысы
