Жоғары қамқоршылық кеңесінің төрағасы Олжас Бектенов ғылым мен өндірісті интеграциялаудың, сондай-ақ Қазақстан ғылыми қоғамдастығының ғылыми инфрақұрылымға қолжетімділігін кеңейту жөніндегі нақты міндеттерді атап көрсетті. NU-дың өнеркәсіптік өндірістерге жақын орналасқан өңірлік жоғары оқу орындарымен өзара іс-қимыл жасау мәселелеріне ерекше назар аударды.
«Университет ғылыми және білім беру ресурстарын дамытуды күшейтіп, өз әзірлемелерін коммерцияландыру үшін өнеркәсіптік кәсіпорындармен әріптестікті нығайтуға тиіс. Мұның барлығы ғылымның ел экономикасына қосатын үлесін арттыруға ықпал етеді. Зияткерлік мектептердің әлеуетін өңірлердегі мектептерді қолдау үшін барынша пайдалану керек. Міндетіміз – балаларды сапалы біліммен қамтамасыз ету. Бұған қажетті қолдау көрсетіледі», деді О.Бектенов.
Қазіргі уақытта NU зертханаларындағы зерттеушілер тобы жасанды интеллектіні дамыту, жасыл технологияларды енгізу үшін оптоэлектроника саласындағы инновацияларды зерттеу, күрделі ауруларды диагностикалау және емдеу мүмкіндіктерін кеңейту мәселелерімен айналысады.
«Біз препараттың бірінші және екінші фазаларын бастапқы зерттеуді аяқтадық және жақсы нәтижелерге қол жеткіздік. Біз клиникалық сынақтарды жүргізуді жалғастырамыз, оның барысында емделу кезінде максималды әсер алу үшін препараттың ең жоғары төзімді дозасына шығу керек», деді өз командасының қатерлі ісікке қарсы тиімді дәрі жасауы туралы National Laboratory Astana (NLA) директоры Дос Сарбасов.
Онкологиялық препаратты әзірлеу – NLA-ның жалғыз жобасы емес. 5 қуатты электронды микроскоппен жабдықталған зертханада жаратылыстану және инженерлік салалардағы стартап үшін бірлескен зерттеулер жүргізеді.
«Зертханамызда дамытып жатқан негізгі бағыттардың бірі – референсті геномды зерттеу. Яғни геномдық нұсқалардың референсті базасын құру үшін басқа популяциялардан қаншалықты ерекшеленетінімізді зерттеу», деді NU жанындағы NLA өмір туралы ғылымдар орталығы директорының міндетін атқарушы Айнұр Ақылжанова.
Ғалымдар халқымыздың «генетикалық бейнесін» жасайды. Бұл жұмыс, мысалы, ауруларға бейімділікті анықтауға көмектеседі. Ол болашақта азаматтардың денсаулығын қорғауға және отандық медицинаны дамытуға үлес қосуға мүмкіндік береді.
NU ақылды жүйелер және жасанды интеллект институтының ғалымдар тобы Жоғары қамқоршылар кеңесінің мүшелеріне суды тазарту және сутегі генерациясы бойынша зерттеулер жүргізуге мүмкіндік беретін I-NURA үдеткішін ұсынды.
Сонымен қатар Берклидегі Лоуренс Ұлттық зертханасымен (АҚШ) бірлесе жасалған үдеткіш көрсетілді. Ол суды тазарту және сутегі генерациясы бойынша зерттеулер жүргізуге мүмкіндік береді.
