Фото: Виктор Федюнин
Instagram желісінде тараған жазбаға сәйкес, туған анасы екі қызын - екі жасар Миа мен төрт жасар Каринаны тұншықтырып өлтірген. Анықталғандай, жас ана қыздарына ұзақ уақыт бойы тамақ бермеген. Ақыры белгісіз уақыт бойы аш отырған балалар анысының қолынан ажал құшты. Ира есімді 21 жастағы әйелдің алты айлық үшінші қызы да бар, алайда ол оған қол тигізбеген.
«Оқиға 4 сәуір күні болған. Ира дәл сол күні түскі ас кезінде балаларды тұншықтырып өлтірді. Олар анасынан тамақ сұрап, мазасын алған-мыс. Қыздардың мәйітін келіншекпен бірге тұратын ер адам тауып алды, Ира болса оны кешке дейін күтіп, қыздар белгісіз себептермен өздері көз жұмғанын айтты. Сол кезде ер адам полиция қызметкерлерін шақыруды жөн көрді. Қыздардың анасы полицейлерді де жаңылыстырғысы келіп, балалар белгісіз заттан уланғанын алға тартты. Үй ішін қарап шыққан полиция қызметкерлері ас үйде ыстық тамақ түгілі, бір үзім нан да болмағанын көрген», делінген видеода.
Қыздар ұзақ уақыт бойы тамақ ішпегенін ешкім білмеген. Көршілері бұл отбасыға картоп та ұсынған кездер болды, алайда жағдай тым күрделі екенін аңғармаған.
Еске салайық, 4 сәуірде Қарағанды облысының Бұқар жырау ауданында 21 жастағы әйел 2 және 4 жастағы қыздарын тұншықтырып өлтірген.
