Мемлекет басшысы Қасым-Жомарт Тоқаев облыстар мен қалалардың әкімдеріне аумақтарды абаттандыру, көгалдандыру жөнінде бірқатар тапсырма берді. Оның ішінде cу тасқынына ұшырамаған облыстар мен қалалардың әкімдеріне көшелерді тазарту, көгалдандыру және елді мекендердің аумақтарын абаттандыру науқанын бастауды тапсырды. Сонымен қатар жолдарды ретке келтіру міндеті жүктелді. Осыған орай қолға алынған акцияның алғашқы жұмасы «Таза өлке» деп аталып, өңірлердегі тұрғындар мен қоғам белсенділері, мекемелер өз аула-жайын тазартуға кірісті. 20 сәуірге дейін жалғасатын науқанның екінші аптасына «Киелі мекен» атауы берілген. Бұл күндері тарихи-мәдени ескерткіштер аумағын абаттандыру жұмыстары жүргізіледі. 27 сәуірге дейінгі үшінші жұмаға «Жасыл аймақ» тақырыбы қойылып, көшеттер отырғызылып, ағаштардың түбі әктеледі. «Өнегелі ұрпақ» дейтін төртінші аптада ардагерлер сарайы мен қарттар үйлерінің аумақтарын тазарту көзделген. Соңғы бесінші аптада «Мөлдір бұлақ» атауымен өзен-бұлақтардың арнасы қоқыстан тазартылады.
«Негізгі мақсат – халық арасында қоғамдық және экологиялық мәдениетті қалыптастыру, отансүйгіштік, туған жерге және қоршаған ортаға деген жанашырлық пен құрмет құндылықтарын дәріптеу. Оның аясында қыстан кейін елді мекендерді тазарту және абаттандыру жұмыстарына азаматтарды кеңінен тарту және осы іс-шараларға белсенді жастардың, еріктілердің әлеуетін жұмылдыру көзделіп отыр. Жалпы, елді мекендерді абаттандыру жұмыстары дәстүрлі түрде жүргізіледі. Бірақ дәл осындай форматта акция алғашқы рет ұйымдастырылып отыр. Іс-шаралар өңірлердің өзіндік жоспарына сәйкес апта барысында өткізіледі. Негізгі екпін – әрбір аптаның сенбісі. Яғни халықтың әртүрлі санатын кең қамтуымен өткізілетін негізгі тақырыптық іс-шаралар дәл осы күні өткізілуге тиіс. Сонымен бірге акция аясындағы аптаның әрбір күні жекелеген өңірдің бастамалары жүзеге асады. Мысалы, 8 сәуір – Алматы қаласы, 9 сәуір – Қызылорда облысы, 10 сәуір – Жамбыл облысы, 11 сәуір – Түркістан облысы, 12 сәуір – Шымкент қаласы және тағы сол сияқты», деді Мәдениет және ақпарат министрлігі Жастар және отбасы істері комитетінің төрағасы Қайрат Қамбаров.
Жоба елордада 13 сәуір мен 11 мамыр аралығында «Таза Қазақстан. Астана – тазалық пен тәртіптің үлгісі» атауымен өтеді. Экологиялық айлық аясында қаланы, нөсер және арық кәріз желілерін санитарлық тазарту, көшелерді, тротуарлар мен аумақтарды, саябақтар мен скверлердегі жасыл желектерді күту бойынша маусымдық агротехникалық жұмыстар жүргізіледі. Сондай-ақ 270 мыңнан астам ағаш отырғызылмақшы.
Бүгінде акцияға өңірлер де біртіндеп қосылып жатыр. Мәселен, Алматы қаласындағы алғашқы іс-шара «Алматы – біздің ортақ үйіміз» жалпықалалық науқаны аясында өтті. Алып шаһардың 8 шағын ауданында коммуналдық қызметтер мен мердігерлік ұйымдар саябақтар мен парктерде тазалық жұмыстарын жүргізді. Алматы қалалық мобильділік басқармасы мен аудан әкімдіктері бір айда 480 бағдаршам, 1 765 аялдама павильонын ретке келтіріп, 300 мың шаршы метр жолды жөндеуге кіріседі.
«Біздің қала – біздің аула, біздің үй» апталығында 20 мыңнан астам ағаш пен бұта көшеті отырғызылады. Ағаш отырғызамын дегендерге көшет, ал жеке үйлердің қоршауын сырлағысы келетіндерге бояу беріледі. Осы кезеңде табиғатты сақтауға арналған түрлі шығармашылық әрі экологиялық іс-шара өтеді. Оның қатарында дәмханалар мен мейрамханалардан тамақ қалдықтарын жинау, мерзімі өткен дәрі-дәрмекті өткізу сияқты жобалар бар. Мұның барлығы қоршаған ортаны сақтауға бағытталған. Жалпы, науқан бір айға созылады. Оған коммуналдық қызметтің жұмысшылары ғана емес, қала тұрғындары да, кәсіпкерлер де қолынан келгенше атсалыса алады. Осында тұрып жатқан әрбір адам – қаланың бір бөлшегі. Егер бәріміз шаһардың тазалығына, көгалдандыруға үлес қоссақ, Алматымыз бұдан да көркейе түседі», деді Алматы қаласы Әуезов аудандық көріктендіру бөлімінің бас маманы Ертай Құрманғалиев.
Ал Түркістан облысында жоба аясында 200 мыңнан аса көшет отырғызылды. Іс-шара «Сенбілік – тазалық айнасы» атауымен ұйымдастырылып, жергілікті әкімдіктер, барлық мемлекеттік мекеме мен кәсіпкерлік ұйымдар, еріктілер, аудан, қаладағы жастар орталықтары да атсалысты. Абаттандыру, көгалдандыру және тазалық жұмыстарын сапалы жүргізбеген билік өкілдеріне сын-ескертпе де айтылды. Мәселе Түркістан облысы әкімі аппаратының апталық мәжілісінде арнайы қаралды.
Облыс әкімінің бірінші орынбасары Зұлпыхар Жолдасовтың айтуынша, Мемлекет басшысының осы салаға қатысты тапсырмаларын орындау мақсатында 2024–2026 жылы қалаларды көгалдандыру және абаттандыру жол картасы бекітілген.
Акцияны қолдаған Ұлытау облысындағы 437 еңбек ұжымынан 6 мыңнан астам ағайын сенбілікке шығып, 110 арнайы техника жұмылдырылып, 470 гектар аумақ қоқыстан тазартылыпты. Жаңа қоқыс жәшіктері орнатылып, 965 ағаштың қураған бұтақтары кесілген.
Қоршаған ортаның тазалығына жауапкершілікпен қарау – әр азаматтың басты міндеті. Мұны ескерген шымкенттіктер де «Таза Қазақстан» акциясы аясында тазалық жұмыстарын бастады. Жиылған жұрт көшелерді сыпырып, арықтар мен жол жиегіндегі қоқыстарды жинап, аялдамалардың әрін келтірді.
