Шонжы ауылындағы біріншілікте көкпардан ересектер сынға түссе, аударыспақ, теңге ілу, жамбы атудан 2004-2006 жылғы тақымы мықты жастар жарысты.
Ат жалындағы бәсекелі жарыс қорытындысы бойынша жамбы атуда түрік стилі бойынша Жарылқасын Бекарыс, корей стилінде Шарынбай Мадияр, қазақ стилінде Қазбек Асылбек жеңімпаз атанды.
Жамбы атудан жалпы командалық есепте Қарасай ауданының спортшылары 1-орынды иемденсе, 2-орын Қонаев қаласының, ал жүлделі 3-орын Еңбекшіқазақ ауданының еншісіне тиді.
Аударыспақта да 55 пен 95 кг арасындағы әртүрлі салмақ дәрежелері бойынша кіл мықтылар анықталды.
«Қос құлаш», «Бес белес» және «Жеті құт» стилі бойынша теңге ілуден сынға түскен спортшылардың жарысы чемпионаттың көрігін қыздырып, көрерменнің қошеметіне бөленді.
Көксеркені тақымдап, қара жердің шаңын шығарған көкпар жарысында Жамбыл ауданының спортшылары алдына қара салмай, жеңімпаз атанса, 2 және 3-орындарды Кеген мен Райымбек ауданының командалары өзара бөлісті.
Жекелеген аталымдар бойынша Райымбек ауданынан келген көкпаршы Абай Мағжан – «Ең үздік салымшы», Жамбыл ауданының спортшысы Ноғайбек Дулат – «Ең үздік қорғаушы», ал кегендік Серікжан Бақдәулет «Ең үздік ойыншы» аталымын еншіледі.
Ұлтымыздың рухын асқақтатқан ат спорты жарысында таулы өңірдің түлектері теңдессіз ойын өрнегін көрсете білді. Жалпы командалық есеп бойынша Райымбек ауданы 1-орын алса, 2-орынға Кеген ауданының спортшылары табан тіреді. Ал 3-орынды Қонаев қаласының командасы иеленді. Жарыс жеңімпаздары мен жүлдегерлерге арнайы медальдар мен грамоталар, ақшалай сертификаттар табыс етілді.
Алматы облысы
