Жылдық инфляцияның ең жоғарғы мәні Қарағанды мен Маңғыстау облыстарында тіркелген. Наурызда азық-түлік тауарларының бағасы жылдық 6,9%-ға дейін баяулаған (ақпанда – 7,4%). Осы топтағы тауарлардың бағасы Ұлытау облысында (10,5%) барынша қарқынды, ал Алматы облысында (4,3%) мейлінше баяу өсіпті.
«Азық-түлікке жатпайтын тауарлар бағасының өсу қарқыны 8,2%-ға дейін бәсеңдеді (ақпанда – 8,5%). Ең жоғарғы мән Маңғыстау облысында (13,2%), ең төменгі мән Жетісу облысында (6,5%) тіркелді. Наурызда ақылы көрсетілетін қызмет бағасы 13,2%-ға дейін жеделдеді (ақпанда – 12,8%). Сонымен қатар Павлодар облысында баға жалпы республикалық деңгейден біршама тез (18,2%), Ұлытау облысында (8,6%) айтарлықтай баяу өсті», делінген ҰБ хабарламасында.
Наурызда ел бойынша айлық инфляция 0,7%-ға шарықтады. Бұл – тарихи орташа мәннен жоғары (2017-2021 жылдардағы наурызда – 0,6%).
Еске салайық, бірнеше күн бұрын ҰБ базалық мөлшерлемені 14,75% деңгейінде сақтау туралы шешім қабылдады. Шешім қабылдау кезінде инфляцияның динамикасы мен тәуекелдер балансы ескерілген. Базалық мөлшерлеменің деңгейін өзгертуде байыптылық қажет деп есептейді бас банк басшылығы.
