Көкшетау қаласына жаңа әкім тағайындалды

АСТАНА. 6 қаңтар. Ақмола облысының басшысы Сергей Кулагиннің өкімімен және қалалық мәслихат депутаттары келісімі негізінде Маржықпаев Ермек Боранбайұлы Көкшетау қаласының әкімі болып тағайындалды. Бұл туралы «ҚазАқпарат» хабарлады. Ермек Б Маржықпаев 1969 жылы туған. Жоғары білімді. 1994 жылы С.Сейфуллин атындағы Ақмола мемлекеттік педагогикалық институтын тарих пәні мұғалімі мамандығы бойынша, 2001 жылы «Тұран» университетін заңгер мамандығы бойынша, 2009 жылы Көкшетау университетін қаржы баклавры мамандығы бойынша аяқтаған. Еңбек жолын 1991 жылы Астана қаласының №29 орта мектебінің дене шынықтыру пәнінің мұғалімі, бокс бапкері болып бастады. 1993 жылғы қаңтардан бастап 1994 жылғы қараша аралығында Щучье ауданы Бурабай кентінің №7 орта мектебінде тарих пәнінің мұғалімі болып жұмыс істеген. 1994 жылғы қараша мен 1995 жылғы маусым аралығында Щучье қаласы «Шонай» шағын кәсіпорынының директоры қызметінде болды. 1995 жылғы маусымнан бастап «Береке-Бурабай» ЖШС бас директоры қызметін атқарды. 2008 жылғы тамыздан бастап Аршалы ауданының әкімі, 2012 жылғы сәуірден бастап 2013 жылғы қыркүйек аралығында Зеренді ауданының әкімі болды. Кейін, 2014 жылғы маусымға дейін Ақмола облысы әкімінің орынбасары қызметін атқарды. Осы тағайындауға дейінгі қызмет орны – Президент әкімшілігі мемлекеттік бақылау және аумақтық-ұйымдастыру бөлімінің мемлекеттік инспекторы. Жолдыбай Базар. Дерек, сурет: «ҚазАқпарат».