Халқымыз «Ер басына күн туса, етігімен су кешер» дейді. Бейбіт күннің өзінде түрлі қылмыстың алдын алып, қара басын қауіп-қатерге тігіп жүретін полиция қызметкерлері қазірде тіпті қауырт жұмыс кестесіне көшкен.
Осы кезге дейін Батыс Қазақстан облысында 8 мыңдай адам тасқын судан қауіпсіз жерге көшірілсе, соның барлығының басы-қасында құқық сақшылары жүрді. Су шайып, жабыны бүлінген жолдардың тұсында да тәулік бойы кезекшілік ұйымдастырып, қауіпсіздікті қамтамасыз етіп жүр.
БҚО полиция департаментінің басшысы, полиция полковнигі Арман Оразалиевтің айтуына қарағанда, облыс бойынша су тасқынына қарсы іс-шараларға күні бүгін 700-ден астам полиция қызметкері мен 104 техника жұмылған.
Адам баласы қызық. Кейбір кісілер бүкіл елге келген қауіп-қатер жалғыз өзін айналып өтіп кетердей қамсыз жүреді. Тілсіз жау табалдырығына келіп, шегінетін жер қалмағанда шарасыз күйге түседі. Полиция қызметкерлері осындай талай жанды ажалдан арашалап алып шықты.
Мысалы, өткенде еріген су Ұзынкөл су қоймасына жан-жақтан құйылып, бөгетті бұзып кете жаздады. Іргедегі ауылды басып кету қаупі төнді. Сын сағатта ауыл тұрғындарының өзін ғана емес, мал-мүлкі мен төрт түлік малын құтқару қажет болды. Осы қарбаластың ішінде төтеншеліктер және Ұлттық ұлан сарбаздарымен бірге полиция қызметкерлері де жүрді. Сол күндері Ұзынкөл, Жаңаөмір, Кемер, Юбилейный елді мекендерінен 2 829 адам көшірілген екен.
Сәуірдің 4-і күні «Вымпел» саяжайында тосын оқиға болды. Алдын ала хабарландыруға қарамастан, саяжай үйлерінің бірінде адам қалып қойған. Қас пен көздің арасында айналаға лап қойған тасқын судың ортасында қалған бейшара үйінің шатырына шығып үлгеріп, саяжай төрағасына хабарласыпты. Дабыл Шаған полиция бөліміне де түсті. Жергілікті полиция қызметі бөлімшесі №21 учаскелік полиция пунктінің аға учаскелік инспекторы, полиция капитаны Дидар Өтепов оқиға орнына жедел жетіп, су ортасында қалған азаматты қайықпен құтқарып алды.
Ал сәуір айының 2-сінен 3-іне қараған түні болған мына оқиға да бір отбасының трагедиясына айнала жаздады. 1966 жылы туған азамат Ақсай қаласында вахталық жұмысынан шығып, өзі тұратын Кеңтүбек ауылына жаяу тартып кетіпті. Ауылға 5 шақырым жақын келіп, айналаны су басып кеткенін көреді. Кешіп өтуге судың ағысы қатты, айналуға басы көрінбейді, тас қараңғы. Сөйтіп, жүргенде телефонының қуаты таусылады. Амалсыздан тұрған жерінде көмек күтуге тура келеді. Жағдайды айтып, полициядан көмек сұраған жұбайы қатты алаңдаулы еді. Түн ішінде ауылдың учаскелік полиция инспекторы, полиция аға лейтенанты Асхат Кәукеев жолға шығып, ауыл адамдарымен бірге трактормен төңіректі шарлап шықты. Абырой болғанда азамат табылды, қатты тоңып қалғанымен дін аман болып шықты. Айта берсе, мұндай мысалдар көп.
Қазір батысқазақстандықтар Жайықтан келетін жойқын су тасқынын қарсы алуға дайындалып жатыр. Мыңдаған адам өзен жайылмаларындағы елді мекендерден қауіпсіз жерге көшірілді. Олардың тұрғын үйлерін де сұғанақ қолдардан полиция күзетіп тұр. Өңірдің су басу қаупі бар аймақтары мен су нысандарында 24 сағаттық кезекшілік ұйымдастырылған.
Облыстық полиция департаментінің басшысы Арман Оразалиев жақында облыс прокуроры, 3-сыныпты мемлекеттік әділет кеңесшісі Серік Шалабаевпен бірге қала маңындағы елді мекендер мен саяжай қоғамдарын аралап шыққан еді.
Жергілікті тұрғындармен болған бұл кездесулер өте пайдалы болды. Халықтың көңіліндегі уайым сейілген сыңайлы. Жеке мүліктің сақталуы, адам құқығының қорғалуы, табиғат апатынан келген шығындардың орнын толтыру мәселесі көпшілікті алаңдататыны анық. Құқық қорғау саласының жоғары лауазымды басшыларымен тіке жүздесіп, сауалдарына нақты жауап алған халық жергілікті билік өкілдері, мемлекет тарапынан жасалып жатқан кешенді қамқорлыққа алғыс айтты.
– «Апат айтып келмейді». Су тасқыны күтпеген сәтте келіп, біршама ауылды, үйлерді шайып кетті. Бірақ мен сіздерге Батыс Қазақстан полициясының жеке құрамы қашанда халықпен бірге екенін айтқым келеді. Біз үшін ең маңыздысы – азаматтардың амандығы, қоғамдық тәртіпті сақтау, қоғамдағы, жолдағы қауіпсіздікті қамтамасыз ету. Полиция қызметкерлері тікелей міндеттерімен қатар су басқан және су басу қаупі бар ауылдарда, саяжайларда тәулік бойы қызмет етіп, қолынан келетін барлық көмекті көрсетіп жатыр. Еліміздің басына түскен бұл сынақты бірге еңсеруге біз дайынбыз, – деді өз сөзінде полиция департаментінің басшысы.
Батыс Қазақстан облысы
