Бір ғасырдан астам уақыттан бері тойланып келе жатқан мейрамның тарихи мәні зор. Себебі 1920 жылы 23 сәуірде Түркия Ұлы Ұлттық Мәжілісі құрылды. Содан бастап Түркия Республикасының негізін қалаушы Мұстафа Кемал Ататүрік бұл күнді «Ұлттық егемендік және балалар күні» деп жариялап, балаларға тарту еткен екен. Осыдан кейін жыл сайын Түркияда 23 сәуір «Ұлттық егемендік және балалар күні» ретінде аталып, елдің түкпір-түкпірінде балаларға арналған үлкен іс-шаралар ұйымдастырылады.
Еліміздегі Түркия елшілігі де өз елдеріндегі меншікті мейрамды ұмыт қалдырмау мақсатында астаналық балаларға көңілді мереке ұйымдастырды. Ертегі кейіпкерлерімен би билеп, сиқырға толы ойынға қатысқан балдырғандардың қуанышында шек жоқ. Сонымен бірге мультфильм қаһармандарының бейнесін сомдаған аниматорлардың сүйемелдеуімен және түрлі бояу жұмыстарымен танысып, өздері де бір сәт ғажайып әлемінің кейіпкеріне енді. Олардың қатарында Қазақстанда тұратын түрік балалар ғана емес, елордадағы қиын өмірлік жағдайға түскен отбасының балалары мен балалар үйінің 20 тәрбиеленушісі де шақыртылды. Мерекеге орай Астанадағы Түркия Республикасы елшілігінің ұйымдастыруымен мерекелік бағдарлама ұйымдастырылды.
Ең қызығы, жылдағы дәстүр бойынша биыл да Түркия Республикасының елшісі Мұстафа Капуджу елшілікке келген кішкентай қонақтарға креслосын табыстады. Мерекелік іс-шара соңы қонақтарға арналған ас мәзірімен жалғасып, мерекелік шараларға қатысушы балаларға түрлі сыйлықтар табыс етумен аяқталды.
