Ақтөбе кәсіпкерлеріне пайдалы бизнес-орталық ашылды

АҚТӨБЕ. 6 қаңтар. Ақтөбе облысында жастардың кәсіпкерлікпен айналысуына айрықша көңіл бөлінуде. Жергілікті атқарушы органдар қалалар мен ауылдық жерлерде оларға қолайлы жағдай туғызудың барлық мүмкіндіктерін қарастыруда. Мысалы, Темір ауданында жақында жас кәсіпкерлер үшін өздерінің сауда үйі болады, олар сауда орындарын жалға алғаны және коммуналдық қызмет үшін ақы төлемейді. Бұл туралы egemen.kz тілшісі хабарлады. Тегін пайдалануға берілетін мұндай ғимаратты табуға және алуға Ақтөбе облысы кәсіпкерлер палатасы Темір аудандық филиалының директоры Айдос Мырзағали көмектесті. Өткен жылы ақпан айында ашылған филиалға өз ісін ашуға талаптанған жастар жалдық төлемі арзандау бизнеске пайдаланатын ғимарат болса деген тілекпен жолыққан. «Мен осы мәселені оң шешуге аудандық әкімдікке өтініш хат жолдадым. Аудан әкімі Бауыржан Қаниев босаған медицина мекемесінің бірінші қабатын кәсіпкерлерге ұсынды. Мұнда 11 жас кәсіпкер жұмыс істейтін болады. Жаңа жылдан бастап химиялық тазарту, тігін цехтары, тұрмыстық техника жөндеу шеберханасы мен дәріхана жұмыс істеуде. Сондай-ақ, болашақта екінші дәрежелі банк те өз қызметін ұсынатын болады», – дейді өңірлік кәсіпкерлер палатасы Темір аудандық филиалының директоры Айдос Мырзағали. Сатыбалды Сәуірбай. Дерек: egemen.kz. Сурет: inform.kz.