Фото: astanatv.kz
Қырғызстанның Кабар агенттігі синоптиктердің болжамына сүйеніп, Талас, Ош, Жалал-Абад, Баткен, Нарын облыстарының басым бөлігінде, Шу, Ыстықкөл облыстарының кей жерлерінде жаңбыр жауып, найзағай ойнап, таулы аймақтарда қар жауады деп хабарлайды. Тау бөктерінде және жолдардың таулы бөліктерінде қар жауып, көктайғақ болады. Батыстан соғатын жел жылдамдығы 4–9 м/с жетеді.
Төтенше жағдайлар министрлігі зардаптардың алдын алу үшін арықтар мен дренаждық арналарды тазалауға кеңес береді.
Ал Ош облысында төтенше жағдай режімі енгізілді. Облыстың елді мекендеріндегі селге байланысты шұғыл шаралар қабылданды. Мырзаке – Қара – Құлжа – Алайқуу тасжолының 41-ші шақырымында сел жүріп, бір адам қаза тапты. Лай ағыны бір отбасының төрт адамы келе жатқан көлікті басып қалды. Жергілікті тұрғындар екі әйел мен бір баланы аман алып қалды. Ер адамды сел алып кеткен. Құтқарушылар оның денесін тауып, туыстарына тапсырды.
Бауырлас елдегі ауыр жағдайға Қазақстан азаматтары алаңдаушылық танытып, әлеуметтік желілер арқылы амандық тілеп, ниеттес екенін білдіріп жатыр.
