Фото: freepik.com
Көгеріп көктем келген соң ауыл аймақтың маңын тазалап абаттандыру қолға алынатыны белгілі. Облыс орталығындағы сәтімен өткен сенбілікке мемлекеттік органдар, кәсіпорын мен ұйымдар және мекемелердің өкілдері белсене қатысты. Бір ғана «Тыныс» акционерлік қоғамы ұжымы 300-ден аса адам болып ортақ іске атсалысты. Қаланың кескін-келбеті, сәні мен салтанаты баршаға ортақ. Сондықтан ауық-ауық осындай сенбіліктер ұйымдастырылып тұрса құба-құп.
– Қала көркіне атсалысып жатырмыз. Біздің ұжымға Абылай хан даңғылының бойын тазалау жүктелді. 70-тен аса адам жұмылып, бір адамдай еңбек еттік, – дейді «Көкшетау жылу» кәсіпорнының директоры Руслан Мақышев.
Тазалық жұмысына коммуналдық қызмет те тартылған. Олар мыңға жуық қап пен 200 кило әк дайындапты. 40-тан аса техника жұмылдырылған. 21 контейнер алаңы тазаланып, тұрмыстық қалдықтар полигонына 2,5 мың текше метр қоқыс шығарылған. Сенбілік барысында көшелер мен жаяу жүргіншілер жолы, арықтардың іші қоқыстан арылды. Осы күні 4 мыңға жуық қала тұрғыны өздерінің сүйікті қаласының сәулетіне атсалысты.
Көкшетау
