Д.Серікбаев атындағы Шығыс Қазақстан техникалық университеті қабырғасында құрылған Лу Бань шеберханасы электромобильдерге қызмет көрсету технологияларымен толық жабдықталған. Пресс турда гибридті автомобильдер мен электромобильдерді диагностикалап жүрген студенттердің жұмысын көрдік. Бұл орталық желтоқсанда ашылғанымен, жетістік жоқ емес. Студенттер көліктердің тетіктерін шашып, қайта жинауға, оны тексеруден өткізуге дағдыланып жүр. Ал мұғалімдер бұған дейін Тяньцзинь университетінде іс-тәжірибеден өтіп келген.
– Байқасақ, Қытайдың көліктері көбейіп келеді. Ертеңгі күні оларға қызмет көрсету үшін кадрларды бүгін даярлауымыз керек. Қазір студенттерді үйретіп жатырмыз. Негізгі бағыт – диагностикалау және қызмет көрсету. Жазға қарай электромобильдерге толықтай диагностика жасай аламыз, – дейді аға оқытушы Динара Мырзабекова.
Әрине, көпшілік электромобильдерге күмәнмен қарайды. Аяқасты істен шықса, кімге жөндетеміз, тетікті қайдан аламыз деген секілді сан түрлі сауал мазалайды. Ал Лу Бань шеберханасындағы мамандардың айтуынша, тетіктер істен шыққанымен, қайта жөндеу қиындық туғызбайтын көрінеді. Сонымен қатар «аккумулятор күшімен жүретін көліктер сақылдаған аязға шыдай ма?» деген сұрақты да қойдық. Бұл да – көпшіліктің көңілінде жүрген сауал.
– Электромобильдердің аккумуляторларын жылыту үшін арнайы құрылғылар бар. Алайда қуат көбірек кетеді. Жалпы, қазіргі таңда жетілдіру жұмыстары жүріп жатыр. Бұл көліктердің үлкен пайдасы ауаны ластамайды. Қуат көзі ғана қажет, – дейді профессор Мұрат Мұздыбаев.
Сонымен қатар БАҚ өкілдері «Автомобильдердің Smart-технологиялары» зертханаларының қызметімен де танысты. ШҚТУ-дың академиялық мәселелер жөніндегі проректоры Әсия Машекенованың айтуынша, биыл осы салада шамамен 80 түлек жоғары білімді маман атанады.
– Облысымызға жұмыс сапарымен келген Президент Қасым-Жомарт Тоқаев Лу Бань шеберханасын еліміздің өзге өңірлерінде де ашу керегін айтты. Шеберхананың алдына қойған міндеттерін кезең-кезеңмен жүзеге асыру үшін ШҚТУ-дың 15 оқытушысы былтыр Қытайға барып, біліктілігін арттырып келді. Оқытушыларымыз биыл тағы да барып, тәжірибе жинақтайды. Алдағы уақытта университет базасында жасанды интеллектіге бағытталған «Лу Бань-2» шеберханасын ашуды жоспарлап отырмыз, – деді Әсия Машекенова.
Ал ШҚТУ академиялық қызмет департаментінің директоры Самат Байгереевтің шеберхана базасында отандық автомобиль құрастыру өнеркәсібі үшін жоғары білікті техникалық және инженерлік мамандар даярланып жатқанын айтады.
– Қазірдің өзінде «Көлік, көлік техникасы және технологиялар», «Жол қозғалысын ұйымдастыру» білім беру бағдарламалары бойынша 400 студент білім алып жатыр. Лу Бань шеберханасында білім алып, біліктіліктерін жетілдірген түлектер көлік құрастыру зауыттарында, автомобильдерді сату және сервистік қызмет көрсету жөніндегі диллерлік орталықтарда, өнеркәсіптік кәсіпорындардың көлік цехтарында қызмет ете алады, – дейді Самат Байгереев.
Айта кетерлігі, «Астана Моторс» компаниясы алдағы жылдың басында көлік зауытын ашуды жоспарлап отыр. Ол жақта да мамандарға деген сұраныс жоғары болады. Жалпы, техникалық университет түлектерінің жұмыспен қамтылуы 96 пайыз. Мұнда оқыған қай сала түлектері болсын, сұранысқа ие.
Өскемен
