Керекулік суретші, Мәдениет қайраткері Рысбек Стыбаев бір қарағанға қарапайым жан. Бүгінде құрмет демалысына шығып, зейнетін көрер шаққа жетсе де ізденістен танбаған, шалқар шабытынан жаңылмаған. Өңірлік қазақ театрының декорациялық тұрғыдан дамуына, облыстағы сурет пен интерьер, мүсін жасау өнерінің ілгері басуына ұзақ жылдар еңбек сіңірді. Ол кісінің қолтаңбасы болып саналатын өнер туындылары қазір облыстың әр түкпірінде, шекара бойында, қала көшелерінде жарқырап, көргендердің көзін қуантып тұр.
Рысбек Шайкенұлы еліміз тәуелсіздік алған жылы Алматы театр және кино институтын (қазіргі Темірбек Жүргенов атындағы Қазақ ұлттық өнер академиясы) интерьер және жабдықтау мамандығы бойынша тәмамдап, бірден туған елі – Керекуге қайта оралды. Мұнда келе сала жергілікті Суретшілер одағына жұмысқа тұрды. Павлодар қаласы мен өңірдің өзге шаһар-аудандарындағы ғимараттарды безендіруге, интерьерлік дизайнын әзірлеуге атсалысты.
– Кеңес заманында, кейін Қазақстан өз алдына егемен ел болған уақытта жаңадан салынған ғимараттардың интерьерлік дизайнын жасауға айрықша мән берілетін. Яғни маман ретінде сәулетті ғимараттардың ішкі безендірілуін, қабырғасының әрленуін, қандай өрнектер мен суреттер салынатынын, тіпті төбесіндегі және еденіндегі өрнектердің қандай болатынын алдын ала суретке түсіріп, жоба ретінде ұсынатынбыз. Ол жерде жергілікті климат жағдайлары ескерілуі керек. Мысалы, қысы суық теріскей өңірде кез келген ғимараттың сырт кейпінің өзі адамға жылу сыйлап тұруға тиіс. Әлгі жобалардың эксизін жасап, жобалаушыларға ұсынамын. Көп эскиздерім түзетілместен қабылданып жүрді. Бұл институтта алған негізгі мамандығым болғандықтан бастапқыда осы өнер түріне ден қойдым. Дейтұрғанмен бойда тұрған суретшілік өнерді қойып қоя алмайсың ғой. Түрлі симпозиумдерге, халықаралық, республикалық көрмелерге қатыса жүріп, тәжірие жинақтадым. Суретшілік қабілетім де ашылды, – деп әңгімеледі ағамыз.
Сонау 1993-1994 жылдары министрліктің тапсырмасы бойынша Р.Стыбаев өзге әріптестерімен бірлесіп, Қазақстанның Ресейдің Омбы, Новосібір облыстарымен, Алтай өлкесімен шектесетін тұстарына «Қазақстан» деген жазу мен Елтаңба бейнеленген үлкен мөр-белгілер жасады. Ол уақытқа дейін екі мемлекет арасындағы бұл аумақтарда ешбір белгі болмағаны мәлім. Сөйтіп, шекарамыздың шегенделіп, бүтін ел екенімізді көрсететін алғашқы мемлекеттік белгілер орнатылды. Мүсіншілік қабілетінің одан өзге де нәтижелері – түрлі бейнелер мен фигуралар бүгінде Павлодар қаласында, Баянауылда орнатылған.
Суретшінің қолынан шыққан халық өмірі мен салт-дәстүрін, табиғат пейзаждарын, жеке адамдарды суреттейтін картиналары аса танымал. Салған суреттерінің басым бөлігі еліміздің музейлерінде, Германия, Біріккен Араб Әмірліктері, Ресей мемлекеттерінде сақтаулы тұр. Соңғы жылдары жерлес тарихи тұлғалардың портреттерін салумен шұғылданып жүр. Жуықта әйгілі кентанушы Қосым Пішенбаевтың, Ертіс-Баян өңірінің танымал балалар ақыны Мүбәрак Жаманбалиновтың порттерін салып шықты.
Аймауытов атындағы қазақ музыка-драма театры суретшінің өмірінде үлкен із қалдырды десе болғандай. Өнер ұжымында сонау 1993 жылдан бері еңбек еткен Рысбек Шайкенұлы жалпы саны 51 спектакльдің декорациясын жасаған. Бұл – біле білгенге өте ауқымды шаруа. Әр қойылымдағы сахналық безендіру, түрлі конструкциялар, суреттік пішіндер, театр актерлерінің киімі, қойылым афишасы – осының барлығы театр бас суретшісінің қолтаңбалары. «Облыстық театрда арасына аздап үзілістер жасай жүріп, 2016 жылға дейін бас суретші болып қызмет еттім» дейді қылқалам шебері.
Өнер иесі бүгінде зейнет жасына қарамастан еңбек етуін жалғастырып жатыр. Бұқар жырау атындағы әдебиет және өнер музейінде түрлі көрмелердің декорациясын әзірлеуге жауапты. Ол кісінің ұйымдастыруымен саяси қуғын-сүргін құрбандарына, Желтоқсан көтерілісіне, Екінші дүниежүзілік соғыс тақырыбына арналған ерекше үлгідегі көрмелер өткізілді. Өткен жылы Ж.Аймауытов негізін салған «Мәдени кіндік» тарихи ауылының үлгісін жасап шықты.
Қажырлы суретшінің ұзақ жылғы еңбегі ескеріліп, Мәдениет қайраткері атанды, «Павлодар облысы алдында сіңірген еңбегі үшін» төсбелгісімен марапатталған.
Павлодар облысы
