Бұқар жырау ауданы Ботақара кентінде жас дәрігерлер қажеттінің барлығымен қамтамасыз етілген. Ауданда «Дипломмен – ауылға!» бағдарламасы жүйелі іске асып тұр. Бұған сәйкес, тұрғын үй сатып алуға шамамен 9 млн теңге пайызсыз несие қарастырылған. Үй алғысы келмеген жас мамандарға қызметтік тұрғын үйді де таңдау мүмкіндігі бар. Ботақарадағы аудандық аурухананың төрт отбасыға арналған медициналық үйі бар. Орталық жылыту жүйесіне қосылған үйлерде қажетті жиһазбен, тұрмыстық техникамен қамтылған. Үйдің жанында балалар ойын алаңы салынған. Бұл жерден жас медицина мамандары тұрғын үйді жалға алады.
Жалпы, практика дәрігері Ахрор Усманов Қарағанды облысына Оңтүстік Қазақстан өңірінен көшіп келген. Қожа Ахмет Ясауи атындағы Халықаралық қазақ-түрік университетін ойдағыдай аяқтап, дипломын қолына ұстап, Ботақараға қоныс аударады.
– Біздің оқу орнымызға Қарағанды облысынан өкілдер келді, түлектерді жұмысқа шақырды. Олардың ұсынған шарттары ұнады. Ойланып, баруға шешім қабылдадық. Бүгінде уәде етілген барлық келісім жүзеге асты. Әйелім де осы саладан, болашақ медбике, – дейді А.Усманов.
Акушер-гинеколог Ақбота Қожамқұлова да резидентураны тәмамдағаннан соң күйеуімен, екі баласымен бірге Ботақараға көшіп келіп, осында жұмысқа орналасқан.
– Әрине, бұдан басқа да таңдау болды, бірнеше ауруханадан жұмыс орны табылды. Барлық жерде акушер-гинекологтерге сұраныс бар, жалпы, мамандығым сұранысқа ие. Мұнда жақсы жағдай ұсынылды. Мен қалада қалмағаныма өкінбеймін. Барлығы ыңғайлы, баспанаға қатысты уайым жоқ, барлық жағдай жасалған. Біз мұнда керегімізді ғана алып, келе салдық. Дайын пәтерге қоныстанып, келесі күні жұмысқа шықтық. Балалар бірден мектепке орналасты. Үй, жұмыс, мектеп барлығы – жақын жерде. Ұжымым да жақсы, бәрі бірден ұнады. Ауылда жұмыс істеп, кәсіби тәжірибе жинауға болады, – дейді А.Қожамқұлова.
Бұқар жырау аудандық аурухана директоры Данияр Қожабаев бейінді мамандарға қажеттілік әлі де бар дейді. Ауруханада материалдық-техникалық база жаңартылып, заманауи жабдықтар алынып жатыр. Алайда кадр жетіспеушілігі бар. Былтыр осындай бағдарламаның қолдауын сезінген 8 жас қызметкер келген: 3 акушер-гинеколог, 2 жалпы тәжірибелік дәрігер, 3 акушер. Енді ауруханаға бейінді мамандар ауадай қажет. Эндокринолог, ультрадыбыстық зерттеу маманы секілді. Осы орайда Данияр Қожабайұлы ертеректе мұндай бағдарламалардың болмағанын, қазіргі жас дәрігерлерге қолдаудың түр-түрі барын атап өтті.
– Мен осында 90-жылдардың соңында келдім қаладан. Ол уақытта мұндай бағдарламалар болған жоқ. Қазір жас мамандар үшін әзірленген әлеуметтік пакет өте жақсы. Бұл – ауылда жұмыс істеуге керемет ынталандыру, – дейді аурухана директоры.
Бірреттік әлеуметтік көмектің «Дипломмен – ауылға!» бағдарламасынан бөлек екенін айта кетуіміз керек. Бұл – сол көтермеақының үстіне енгізілген қосымша қолдау. Медицина саласында жұмыс істейтін мамандарды қолдау, ауылдағы медицинаны дамыту, ауылдағы кадр тапшылығын шешу үшін әзірленген бағдарлама. Жыл басында Парламент Мәжілісі бағдарламаға қатысты заң жобасын қабылдаған еді.
Осындай байыпты бағдарламаларға сүйене отырып, жас мамандарды ауылға тарту арқылы ондағы дәрігер тапшылығы жойылады. Расымен, дипломы бар кез келген білікті маманға бірнеше таңдау бар. Жан-жақты әлеуметтік қолдау да мол. Жас дәрігерге тек, жалындап тұрып, еңбек ету керек.
Қарағанды облысы
