Украина президенті Қазақстанға ресми сапармен келеді

АСТАНА. 13 қаңтар. Биылғы жылдың бірінші тоқсанында Украина президенті Петр Порошенконың Қазақстанға ресми сапары жоспарланған. Бұл туралы nur.kz хабарлады. «2015 жылдың бірінші тоқсанында Украина президенті Петр Порошенконың Қазақстанға сапары жоспарланып отыр. Сапар аясында экономикалық әріптестік бойынша мемлекетаралық комиссияның 12-ші отырысы өткізіледі. Болашақта авиақұрылыс және ғарышты зерттеу салаларында екіжақты ірі жобаларды іске асыру дайындалуда», – деп мәлімдеді Украинаның Қазақстандағы уақытша сенімді өкілі Юрий Лазебник. Оның айтуынша, Украинадағы жағдайды реттеу аясында Астанада Украина, Франция, Ресей және Германия басшыларының қатысуымен кездесу өткізіледі. «Қазақстан тарапы мұндай кездесуді уақыты белгілі болысымен өткізуге келісімін беріп отыр. Бұл басқосуда, Украина президенті бірнеше рет атап өткендей, өткен жылдың қыркүйегінде қол жеткізілген Минск келісімдерінің толық орындалуын қамтамасыз ету қаралады. Сол келісім орындалуы тиіс», – деді Ю.Лазебник. Айдар Өрісбаев. Дерек: nur.kz. Сурет: tass.com.