Іс-шарада жиынға қатысушылар қауіпсіздіктің өңірлік және халықаралық өзекті мәселелері, соның ішінде су-энергетикалық және азық-түлік қауіпсіздігі жөнінде жан-жақты пікір алмасты.
Сөз басында Ғизат Нұрдәулетов Орталық Азия мемлекеттері президенттерінің мақсаткерлік күш-жігерінің және бірізді қадамдарының арқасында ортаазиялық ықпалдастық жаңа деңгейге көтеріліп отырғанын атап өтті.
– Бұл елдеріміз арасында орнаған сенім, достық пен татукөршіліктің санғасырлық дәнекерін нығайтуға деген ұмтылысты білдіреді. Қарым-қатынасымызды тереңдетуде Орталық Азия мемлекеттері басшыларының консультативтік кездесуі маңызды рөлге ие. Бірлескен өзара іс-қимылдың бұл үлгісі сауда, өнеркәсіптік кооперация, энергетика, көлік және логистика салаларындағы жан-жақты ынтымақтастықтың дамуына айтарлықтай серпін берді, – деді Қауіпсіздік кеңесінің хатшысы.
Ғизат Нұрдәулетов сондай-ақ қазіргі таңда алдағы тамыз айында Астанада болатын VI Саммитті ойдағыдай өткізудің дайындық жұмыстары қызу жүріп жатқанын айтып өтті.
Бұдан бөлек, тараптар Орталық Азия елдерінің көлік қауіпсіздігі және көлік-логистика әлеуетін дамыту аспектілерін талқылады.
Қауіпсіздік кеңесінің хатшысы әріптестеріне аталған мәселелер бойынша Қазақстанның ұстанымын жеткізді. Трансшекаралық өзен ресурстарын тиімді басқару, тең және әділ су пайдалану қағидаларына негізделіп, шоғырландырылған су саясатын әзірлеу және жүзеге асыру, өзара міндеттемелерді мүлтіксіз орындау бойынша ынтымақтастықты дамыту жөнінде бірқатар ұсыныс енгізді.
– Геосаяси және геоэкономикалық турбуленттілік өңіріміздің қауіпсіздік жағдайына теріс әсерін тигізеді. Бүгінгі бізбен болған кездесуде Қазақстан Президенті Қасым-Жомарт Тоқаев атап өткендей, Орталық Азия елдері Қауіпсіздік кеңесінің хатшылары деңгейіндегі кездесулер сыртқы және ішкі қауіп-қатерлерге қарсы тұруда күш-жігерді біріктіру алаңы болуға бағытталған. Сонымен қатар біздің өзара іс-қимыл форматымыз саяси және сауда-экономикалық ынтымақтастықты дамытудағы оң динамиканы нығайтуға септігін тигізбек, – деген Ғ.Нұрдәулетов осы мүмкіндікті пайдаланып, еліміздегі су тасқыны кезінде туыстық тілектестігін білдіріп және гуманитарлық көмегін көрсеткен ортаазиялық бауырлас елдерге шынайы алғысын білдірді.
Сондай-ақ ол мемлекеттеріміздің мүдделерін ескере отырып, бүгінгі кездесудің күн тәртібі бекітілгенін атып өтті.
– Біз бастапқы кезеңде үш тармаққа басымдық беріп, оларды жүзеге асыру үшін дәйекті түрде ілгерілеуге уағдаластық. Бірінші, су-энергетикалық қауіпсіздігі, екінші, азық-түлік қауіпсіздігі, үшінші, Орталық Азия елдерінің қауіпсіздігі мен көлік-логистикалық әлеуетін дамыту. Көрсетілген барлық бағыт орнықты әлеуметтік-экономикалық
дамуға өзекті әрі маңызды болып отыр. Сондықтан олар өңірдегі стратегиялық тұрақтылықты қамтамасыз етуді ескере отырып, үйлестірілген салааралық тәсілдерді талап етеді, – деді Ғ.Нұрдәулетов.
Маңызды жиында Орталық Азия азық-түлік қауіпсіздігін қамтамасыз етудің ортақ стратегиялық тәсілдерін қалыптастыру, сондай-ақ экономикалық байланысты нығайту мақсатында көлік дәліздерін одан әрі дамыту қажеттігі атап өтілді.
Бірінші кездесудің қорытындысы бойынша тараптар өңірлік қауіпсіздікті нығайту саласындағы тығыз ынтымақтастықты жалғастыруға дайын екендерін білдірді.
