Малайзия премьер-министрі Әнуар Ибрагим 16 мамырда Президент сарайында (Ақорда) Қазақстан Президенті Қасым-Жомарт Тоқаевпен кездесті. Премьер-министр делегациялардың екіжақты кездесуі барысында бірқатар келісімге қол жеткізілгенін мәлім етті, екі ел арасындағы сауда, инвестиция, жоғары білім, туризм және халал индустриясы сияқты әртүрлі саладағы ынтымақтастықтың кеңірек талқыланғанын атап өтті.
Әнуар Ибрагим Астанаға сапары туралы X желісіндегі аккаунтында да жазды. «Ресми қабылдаудан кейін Президент Тоқаев екеуіміз Малайзия мен Қазақстан арасындағы қарым-қатынасқа қатысты маңызды мәселелерді талқылап, төрт тармақтан тұратын кездесу өткіздік, оның барысында өзара қызығушылық тудыратын халықаралық мәселелер де сөз болды», деді ол X әлеуметтік желісінде.
Экономиканы ырықтандыру шаралары
Қазақстан Президенті Қасым-Жомарт Тоқаев бәсекелестікті дамыту, мемлекеттің экономикадағы үлесін азайту және бизнес шығындарын қысқарту арқылы кәсіпкерліктің еркіндігін қамтамасыз етуге бағытталған экономиканы ырықтандыру шаралары туралы жарлыққа қол қойды.
Жарлықтың басты ерекшеліктеріне назар аудара келіп, бес тармақты атап өтуге болады. Оның ішінде Бәсекелестікті қорғау және дамыту агенттігінің жанынан Ұлттық жекешелендіру офисін құру жоспары, «Самұрық-Қазына» Ұлттық әл-ауқат қоры мен оның еншілес ұйымдарын корпоративтік басқару дербестігін, сапасын және тәуелсіздігін арттыру, сондай-ақ олардың сатып алу рәсімдерін жетілдіру бойынша шаралар қабылданып жатқаны қуантады.
Сондай-ақ Жарлық аясында өнім нарығында бәсекелестікті дамытуға бірқатар нақты шара қарастырылып, реттеу саясатын жетілдіру және бизнес ашу, жүргізу рәсімдерін ырықтандыру шаралары ұсынылады.
Жарлық кәсіпкерлік субъектілерінің құқығы мен заңды мүдделерін қорғауды күшейтуге бағытталған шаралар кешенін қамтиды. Оны жүзеге асыру экономикадағы мемлекеттік сектордың үлесін айтарлықтай қысқартуға және жеделдетуге, сондай-ақ жеке кәсіпкерлікке көбірек мүмкіндіктер ашуға септігін тигізеді.
Тікелей инвестицияның рекордтық көрсеткіші
Президент Қасым-Жомарт Тоқаев Германияның компаниялары Қазақстандағы үлесін кеңейтуге мүдделі екенін айтты. Оның мәлімдеуінше, Германияның Қазақстанға салған тікелей инвестициясы 712 миллион еуроны құрады.
Қазақстанның Германия Федеративтік Республикасындағы елшілігінің хабарлауынша, Германияның Қазақстанға салған тікелей инвестициясы 2023 жылы рекордтық деңгейге – 712 миллион еуроға жетті. Бұл деректі Қазақстан Президенті Қ.Тоқаев 15 мамырда өткен Германия экономикасы Шығыс комитетінің делегациясымен кездесуі кезінде келтірді. «Бұл көрсеткіш 2022 жылмен салыстырғанда 64 пайызға өсті», деді Қ.Тоқаев.
Тауар айналымы артып келеді
2023 жылы Қазақстанның Орталық Азия елдерімен тауар айналымы 7,7 млрд долларға жетті.
Мұндай деректі сауда және интеграция вице-министрі Қайрат Төребаев 14 мамырда Алматыда өткен ХІІІ Орталық Азия сауда форумында келтірді. Қ.Төребаев Орталық Азиядағы сауда байланыстарын нығайтудың экономикалық пайдасын, сондай-ақ аймақтағы экономикалық өсімге, жұмыс орындарын ашуға, өмір сүру деңгейін жақсартуға қосқан үлесін атап өтті.
Форумда Қазақстанның 131 елмен сыртқы сауда айналымы 2023 жылы алдыңғы жылмен салыстырғанда 3,2%-ға өсіп, 139,8 млрд долларға жеткені атап өтілді. Бұл сауда рәсімдерін жеңілдету, сыртқы экономикалық белсенділікті ынталандыру есебінен болып отыр.
