Павлодарлықтар батыр жерлестерін еске алды

ПАВЛОДАР. 14 қаңтар. Павлодардағы Достық үйінде Кеңес Одағының Батыры Махмет Қайырбаевтың туғанына 90 жыл толғаны аталып өтті. Бұл туралы egemen.kz тілшісі хабарлады. Еске алу кешіне соғыс және еңбек ардагерлері, жастар бірлестіктерінің мүшелері, батырдың зайыбы – Сәбира Әмірқызы, балалары мен туған-туыстары жиналды. Облыстық әкімдік батырдың жары Сәбира апаға қамзол кигізіп, сый-құрмет көрсетті. Батыр Қайырбаев 18 жасында Александр Невский орденінің иегері атанды. 1944 жылы Литвадағы Шяуляй қаласының батыс жағында болған ұрыста жау әскері танкімен шабуылға шығып, Кеңес әскері қорғанысын бұза жарып, Шяуляй қаласына кіруге ұмтылды. Қайырбаев өзінің 15 жауынгерімен қоршауда қалып, шайқасып жатқан полк батареяларының біріне көмекке келді. Қайырбаевтың басшылығымен жауынгерлер жаудың 7-шабуылына тойтарыс беріп, бір батальон әскерін жойды. Кескілескен шайқаста ержүрек Қайырбаев бастаған жауынгерлер Шяуляй қаласына өтер жолды жапты. Соғыстан кейін батыр ағамыз облыста партия қызметінде болды. Кеште батырдың өмір жолы туралы бейнефильм көрсетілді. Фарида Бықай. Дерек: egemen.kz. Сурет: irstar.kz.