Құжатта Маңғыстау облысының өнеркәсіп саласындағы еңбек ресурсының сұранысына сай өңірдің әлеуметтік-экономикалық дамуына білікті кадр даярлауға ерекше назар аударылған. Сондай-ақ ол жастардың еңбек нарығында бәсекеге қабілеттілігін арттырып, өндіріске бейімделуін іске асыратын өндіріс пен оқу орны арасындағы алтын көпір болмақ.
– Біз облысымыздағы маңдайалды білім ордасымен тығыз әріптестік байланысымызды жаңа бағытта дамытпақпыз. Заман сұранысына сай алғыр да талапты жас мамандардың өлке өндірісін көтеруге тың серпін беріп, компаниямызды дамытуға сүбелі үлес қосады деп сенеміз. Қос тараптың бірлескен жобасы талай жасты өз ісінің шеберіне айналдырары анық, – дейді ҚБМ бас директоры Марат Елеусінов.
Меморандумдағы шарт негізінде университет түлектері жұмысқа орналасу үшін «Қаражанбасмұнай» АҚ-да қалыптасқан бос жұмыс орындарының жалпы санының «20%» қағидаты бойынша үш айлық сынақ мерзімінен кейін аутстаффингке қабылданады. Жұмысқа қабылдануға үміткердің GPA деңгейі 3,67-ден кем емес немесе үздік диплом иесі, жасы 18 бен 34 аралығында болуы керек. Сонымен қатар жас мамандарды таңдауда олардың түрлі ғылыми жобалар мен байқаулардағы жетістіктері, ғылыми жетекшілерінің ұсынысы және бұған дейін аталған кен орнында тәжірибеден өткені де ескеріледі.
Ш.Есенов университеті мен «Қаражанбасмұнай» АҚ арасында кәсіби мамандар даярлауда бұрыннан байланыс орнаған. Айталық, 8 білім бағдарламасы негізінде дуалды оқыту жүйесін бірлесіп жүзеге асырып келеді. Сондай-ақ компания әлеуметтік осал топ саналатын білім алушылардың оқу төлемін төлейді. Жоғары оқу орнындағы ғылыми-зерттеу зертханасының ашылуына қолдау көрсетті.
«Қаражанбасмұнай» АҚ бірнеше жылдан бері жастардың өз қабілетін көрсетуі мен дамытуына мол мүмкіндік берді. Бүгінге дейін тәжірибеге бағытталған оқу жобасы аясында 100-ге жуық Ш.Есенов университеті мен колледжі студенті теориялық білімін өндірісте қолданды.
Ләйлім ТАЙЖАНОВА,
Ш.Есенов атындағы Каспий технологиялар және инжиниринг университетінің профессор ассистенті, PhD
Ақтау
