Құрамында Руслан Құрбанов, Елмир Әлімжанов, Вадим Шарлаимов және Ерлік Сертай сынды нояндары бар біздің команда бастапқы бәсекелерде Испания (45:24) мен Украинадан (45:37) басым түссе, жартылай финалда Францияға (37:45) жол берді. Ал қола медаль үшін тартыста әлем чемпиондары деген атағы бар Израильден (45:29) басым түсті. Сөйтіп, жерлестеріміз қола медальды мойындарына ілді.
– Қазақстанның шпагашылары жаңа деңгейге көтерілді. Жерлестеріміз Франция, Жапония, Италия, Мажарстан секілді мемлекеттердің нояндарымен бірге жер-жаһандағы ең мықты командалардың санатына қосылды. Өздеріңіз байқасаңыздар, үздік үштіктің қатарынан көріну біздің жігіттер үшін тұрақты көрсеткішке айналып отыр. Биылғы маусымда өткен жеті командалық турнирдің төртеуінде отандастарымыздың жеңіс тұғырына көтерілуі – осы сөзіміздің айқын дәлелі. Атап айтсақ, Ыстанбұлдағы Әлем кубогінің кезеңдік сайысында – алтын, Қытайдағы Азия чемпионатында – күміс, Тбилиси мен Парижде өткен дүбірлі додаларда қола медальды иелендік. Сондай-ақ былтыр Ханчжоуда алауы тұтанған Азия ойындарын да естен шығармаған абзал. Аталған жарыста отандастарымыз Жапония құрамасынан бір ғана ұпай айырмашылығымен ұтылып, күміспен күптелді, – дейді Қазақстан құрамасының мемлекеттік жаттықтырушысы Тимур Байтасов.
