Мектеп жанындағы және қала сыртындағы лагерьлер оқушыларды қабылдауға қызу дайындыққа кіріскен. Олардың жұмысы 3 маусымда басталады. Облыстық білім басқармасы басшысының орынбасары Бақтыгүл Әдекенова аймақта 160 мың бала лагерьлерге барады дейді.
«Қала сыртындағы лагерьлерге 7 мың, мектеп жанындағы лагерьлерге 140 мыңнан астам бала барады. Ерекше білім беру қажеттілігі бар 2 мың балаға өз мектеп-интернаттарында лагерь ұйымдастырылады. Қосымша білім ұйымдары кестемен жұмыс істей береді. 1 маусымда Пришахтинскіде жаңа Оқушылар сарайы ашылады. 600 балаға арналған «Кәусар» сарайының ғимараты барлық стандартқа сай. Қосымша білім үшін барлық жағдай қарастырылған. HI-TECH, шығармашылық шеберханалары, хореография залы, ART-студия, дыбыс жазу студиясы, телевидение және фотостудия, VR-архитектура және WEB-дизайн студиясы, Intellectum-студия, роботтехника және техникалық шығармашылық студиясы, STEM зертхана, музыка студиясы, экологиялық орталық бағыттары жұмыс істейді. Мұндай сарай Майқұдықта да ашылады деген жоспар бар», дейді Б.Науқанбайқызы.
1–31 тамыз аралығында мектепке дейінгі ұйымдардың тәрбиеленушілерін топтарға ауыстыра бастайды. Бүгінгі таңда облыста 411 мектепке дейінгі ұйым жұмыс істейді. Оларда 39 323 бала қамтылған. Бұл 2 жастан 6 жасқа дейінгі балалардың 82,6 пайызын құрайды.
Мектепке дейінгі ұйымдарда жаңа орындар құру жұмыстары атқарылып жатыр. Осы жылы 2 мыңға жуық жаңа орын ашу жоспарларында бар. Жыл басынан бері Абай, Осакаров, Бұқар жырау аудандары мен Шахтинск қаласында 343 орын ашылған. Қазіргі уақытта «Индиго» мен ҰББДҚ жүйелері бірыңғай республикалық кезекке көшіру аясында біріктіріліп жатыр. Бірыңғай кезек енгізілгеннен кейін ата-аналар орын «ұстап алуға» тырыспайтын болады. Жүйе бос орындар туралы автоматты түрде хабарлап отыратын болады.
Қазір 1-сыныпқа құжат қабылданып жатыр. Ол 31 тамызға дейін жалғасады. Өтінімді еGov, «Білімал» жүйесі арқылы «1-сыныпқа қабылдау» мемлекеттік көрсетілетін қызметтер порталында және қағаз жүзінде беруге болады. Биыл 1-сыныпқа 16 мыңнан астам оқушы барады.
Қарағанды облысы
