Фото: senate.parlam.kz
Комитет төрағасы Сұлтанбек Мәкежанов отырысты аша келіп, кедендік әкімшілендіруді жетілдіру мемлекеттік шекара арқылы өтетін тауарларды неғұрлым тиімді бақылауға, кедендік баж бен салық алымдарын жақсартуға, кәсіпкерлердің шығындарын азайтуға, елдер арасындағы сауда қатынастарына деген сенім деңгейін арттыруға, сондай-ақ еліміздің экономикалық өркендеуіне ықпал ететінін атап өтті.
«Кедендік әкімшілендіру үнемі жетілдіріліп отырады, бірақ сонымен бірге шешуді қажет ететін мәселелер де бар. Шекара маңындағы көлік инфрақұрылымы мен жол белдеулерінің техникалық жай-күйі, қауіптерді басқару жүйесінің жұмысы, кедендік шекара арқылы өтуді жеделдету және оңайлату, мемлекеттік қызметтерді цифрландыру, сондай-ақ кеден органдарының мәртебесі негізгі проблема болып тұр», деп атап өтті С. Мәкежанов.
Қаржы министрлігі Мемлекеттік кірістер комитетінің өкілі өз кезегінде кедендік әкімшілендіруді жетілдіру жұмыстары туралы айтып берді. Қазіргі кезде Қытай, Өзбекстан және Түрікменстан шекарасындағы өткізу бекеттерін толықтай жаңғырту жұмыстары жүріп жатыр. Бұл өткізу қабілетін 6 есеге арттыруға, уақытты 2 сағаттан 25 минутқа дейін қысқартуға және сыбайлас жемқорлық қауіптерін азайтуға мүмкіндік береді. Шекарада топталып қалуды болдырмау үшін электронды кезек жүйесі әзірленді және енгізілді. Оны қолданғанда шекара маңындағы аудандарда әлеуметтік және криминогендік жағдай жақсара түседі, республикалық маңызы бар жолдар бойында көліктің шоғырланып қалуын болдырмауға мүмкіндік береді.
Дөңгелек үстел отырысына Қаржы мониторингі агенттігінің, Ұлттық қауіпсіздік комитетінің, Бас прокуратураның, ұлттық экономика, көлік, өнеркәсіп және құрылыс, ауыл шаруашылығы, цифрлық даму, инновациялар және аэроғарыш өнеркәсібі министрліктерінің, «Атамекен» ҰКП, Қазақстан кеден брокерлері қауымдастығының, сондай-ақ Ұлттық экспедиторлар қауымдастығы мен «ҚТЖ-Жүк тасымалы» компаниясының өкілдері қатысты.
